Oralda jumysynan zańsyz qýylǵan oqytýshy 500 myń teńgesin sot arqyly qaıtaryp aldy
ORAL. QazAqparat - BQO azamattyq ister jónindegi sot alqasy oraldyq oqytýshynyń quqyǵyn qorǵap, ony burynǵy jumysyna qaıta ornalastyrdy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, «№1 balalar óner mektebi» MKQK dırektory T.Álimbaevtyń 2017 jylǵy 31 tamyzdaǵy №33-Q buıryǵymen oqytýshy Qundyz Quzanbaeva jumystan shyǵarylǵan.
Oral qalasy №2 sotynyń 2018 jylǵy 5 jeltoqsandaǵy sheshimimen Q.Quzanbaevanyń atalmysh buıryqty zańsyz dep taný, jumysqa qaıta ornalastyrý týraly talap aryzy qanaǵattandyrýsyz qaldyrylǵan. Birinshi satydaǵy sottyń sheshimimen kelispegen talap qoıýshy apellıatsııalyq shaǵym keltirgen.
Apellıatsııalyq alqa birinshi satydaǵy sot sheshiminiń kúshin tolyqtaı joıa otyryp, talapty qanaǵattandyrý týraly jańa sheshim shyǵardy.
Atalǵan buıryq zańsyz dep tanylyp, kúshi joıyldy.
Sot alqasy otyrysynda málim bolǵanyndaı, Qundyz Quzanbaeva atalmysh mektepke 2015 jyly jumysqa kirisip, bir jyl merzimge kelisimshartqa otyrǵan. Eki ret kelisimshart merzimi uzartylǵan. Úshinshide bul kelisimshart uzartylmaı tastalǵan. Bul daý aldymen sol mekemedegi kelisim komıssııasynda qaralýy tıis edi. Alaıda komıssııa joq degen sebeppen másele qaralmaǵan. Keıin sot sheshimimen komıssııa qurylyp, qaralǵanymen, oqytýshynyń aryzy qanaǵattandyrylmady. Sodan keıin ol sotqa júginýge májbúr bolǵan.
Apellıatsııalyq sot alqasy sheshim shyǵarǵan kezde sol kezde kúshinde bolǵan burynǵy Eńbek kodesi men ujymdyq kelisimshart talaptarynyń buzylǵanyn eskerdi.
Osylaısha sergeldeńge túsken talapker burynǵy jumysyna qaıtadan ornalastyrylyp, onyń paıdasyna májbúrli túrde 6 aı bos júrgendegi 500 myńǵa jýyq teńge ortasha eńbekaqysy men 150 myń teńge kóleminde moraldyq zııan óndirildi.
Sonymen qatar osy is boıynsha anyqtalǵan zańbuzýshylyqtar jóninde tıisti shara qoldaný úshin BQO bilim basqarmasynyń basshylyǵy atyna arnaıy jeke uıǵarym shyǵaryldy.
Sot otyrysy aıaqtalǵannan keıin talap qoıýshynyń ókili (ákesi) Oralhan Quzanbaev 2017 jyldan beri jalǵasyp kele jatqan daýǵa núkte qoıǵan apellıatsııalyq sot alqasynyń sheshimine rıza ekendigin bildirdi.
Eske sala keteıik, budan buryn peshtiń murjasyn aýystyrǵan oraldyq turǵynnyń sotta jaýap berip, aqyry aqtalǵanyn jazǵan bolatynbyz.
