Oralda júkti kelinshek otyrǵan jedel járdem kóligi apatqa ushyrady
BQO polıtsııa departamenti baspasóz qyzmetinen túsken málimetke qaraǵanda,oqıǵa búgin shamamen saǵat 13.47-de boldy.
S.Tıýlenın men M.Sholohov kósheleriniń qıylysynda jedel járdem kóligi men Toyota Aiphard túıisken.
Oqıǵa ornynda polıtsııa qyzmetkerleri jumys jasady.
Oblystyq densaýlyq saqtaý basqarmasynyń naqtylaýynsha, Báıterek aýdany Darııan aýrýhanasynyń sanıtarlyq kóligi ekiqabat áıeldi kardıologtan keńes alý úshin oblystyq kardıologııalyq ortalyqqa apara jatqan.
Kólikte aýrýhana medbıkesi de bolǵan. Arnaıy kólik jaryq berý belgilerimen kele jatsa da, kólikterdiń biri ony ótkibeı, sol jaǵynan túıgen.
Saldarynan jedel járdem kóligi bir búıirine aýdarylyp qaldy.
Oqıǵa ornyna jetken basqa jedel járdem kóligi júkti kelinshekti oblystyq perınataldyq ortalyqqa jetkizdi.
Tekserý kezinde onyń jáne 35-36 apta bolǵan sharananyń zardap shekpegeni anyqtaldy. Degenmen odan ári baqylaý úshin áıel ortalyqqa jatqyzyldy.
Júrgizýshi zardap shekpegen. Medbıkeniń azdap denesi kógergen.
Polıtsııa departamentiniń habarlaýynsha, sol merzimde Abaı dańǵylynda taǵy bir jol-kólik oqıǵasy bolǵan.
Volkswagen Golf avtokóliginiń júrgizýshisi jol qaýipsizdigin qamtamasyz etpesten, belgilenbegen jerden ótip bara jatqan 1952 jylǵy er adamdy qaǵyp ketken.
Densaýlyq saqtaý basqarmasy jabyq bas-mı jaraqatyn alyp, mıy shaıqalǵan er adamnyń qalalyq kópbeıindi aýrýhanaǵa jetkizilgenin aıtty.
