Oralda júk kóligi qaǵyp ketken 5 jasar bala jansaqtaý bóliminde jatyr

ORAL. KAZINFORM — Oral qalasynda «KamAZ» júk kóligi kishkentaı balany qaǵyp ketti.

BQO polıtsııa departamentiniń baspasóz qyzmetinen málim etkenindeı, oqıǵa 21 sáýir kúni keshkisin Zachagan kentindegi E.Brýsılovskıı kóshesi boıynda «Súıinish» dúkeni mańynda boldy.

«KamAZ» júk kóligi belgilenbegen jerden joldan júgirip ótip bara jatqan 5 jasar ul balany qaǵyp ketken. 

— Jol apaty saldarynan bala kóptegen jaraqatpen oblystyq kópbeıindi balalar aýrýhanasyna jetkizildi. Qazirgi kezde oqıǵanyń mán-jaıy anyqtalýda, - dep habarlady vedomstvodan. 

BQO densaýlyq saqtaý basqarmasy baspasóz qyzmetiniń naqtylaýynsha, bıyl jazda alty jasqa tolatyn balanyń jaǵdaıy aýyr. Kúni búgin jansaqtaý bóliminde em alyp jatyr. 

Eske sala keteıik, budan buryn Batys Qazaqstanda jol apatynan eki oqýshynyń kóz jumǵanyn jazǵan bolatynbyz.