Oralda jóndeýge jabylǵan kópirdiń qashan ashylatyny belgili boldy
ORAL. KAZINFORM — Oral qalasynda Derkól kenti baǵytyndaǵy shoıyn kópirde jóndeý jumystary júrgizilip jatyr.
Atalmysh kópir 14 maýsymda jabylǵan bolatyn. Osyǵan baılanysty oblys ortalyǵynda turǵyndardyń qatynaýy qıyndap, keıbir jerlerde keptelister paıda boldy.
Qala ákimdiginen túsken málimetke qaraǵanda, qazirgi ýaqytta merdiger uıym – «Zapad partners» JShS kópirdiń tozǵan asfalt jabynyn frezerleý, deformatsııalyq jikterdi aýystyrý jáne jol tósemin jańartý jumystaryn júzege asyrýda.
Sonymen qatar deformatsııalyq jikter ornatylatyn ýchaskeler daıyndalyp, beton quıý jáne keıinnen jol tańbalaryn salý qarastyrylǵan.
Oral qalasy ákiminiń orynbasary Jandos Dúısenǵalıevtiń aıtýynsha, asfalt tóseýden bólek, uzyndyǵy 72 metr alty deformatsııalyq jik bar.
- Deformatsııalyq jikterdi shveıtsarııalyq kompanııa jasaǵan, ıaǵnı óte sapaly. Kópirdi jóndeý jumystary aldaǵy juma kúni, 19 maýsymda tolyq aıaqtalyp, nysan kólik qozǵalysy úshin qaıta ashylady, - dedi J.Dúısenǵalıev.
Atalǵan jumystar kópirdiń tehnıkalyq jaǵdaıyn jaqsartyp, jol qozǵalysynyń qaýipsizdigin arttyrýǵa múmkindik beredi.
Eske sala keteıik, budan buryn Oralda turǵyndar turmystyq qaldyqtardyń shyǵarylmaı jatqanyn aıtyp shaǵymdanǵanyn jazǵan edik.
