Oralda jolaýshylar avtobýsy órtendi
ORAL. QazAqparat - Oral qalasynda №35 baǵytta qatynaıtyn jolaýshylar avtobýsy órtendi, dep habarlaıdy QazAqparat tilshisi.
Batys Qazaqstan oblystyq Tótenshe jaǵdaılar departamenti órt sóndirý jáne apattyq-qutqarý jumystary qyzmetiniń baspasóz hatshysy Araılym Ǵanıdyń aıtýynsha, oqıǵa 16 qarasha kúni keshkisin Ábilqaıyr han dańǵyly boıynda Tsıolkovskıı aıaldamasy mańynda boldy.
101 nómirine habar saǵat 18.09-da túsken. Avtobýstyń artqy dóńgelegi men salony ishinara janǵan. Órtti sóndirýmen 5 adam jáne 1 arnaıy tehnıka aınalysty.
«Tilsiz jaý» 18.24-te oqshaýlanyp, 18.48-de aýyzdyqtaldy.
«Zardap shekkender joq», - dedi A.Ǵanı.
Jolaýshylardyń sózine qaraǵanda, tútinniń ısi shyqqannan keıin avtobýs toqtap, olar syrtqa shyǵyp úlgergen.
Qazirgi kezde órttiń shyǵý sebebi, keltirilgen shyǵyn jáne kináli adamdar anyqtalý ústinde.
