Oralda jol tártibin 84 ret buzǵan júrgizýshige 1,2 mln teńge aıyppul salyndy

ORAL. QazAqparat – Oralda 23 qazanda 40 statsıonarlyq avtomatty júıesi («Prızma-Stos») ornatylǵannan beri 25 myńnan astam jol erejesin buzý oqıǵasy tirkeldi, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, atalmysh júıe eki baǵytta jyldamdyq rejımin buzǵandardy táýlik boıy tirkeıdi.

Atalǵan júıe iske qosylǵannan beri jol jyldamdyǵyn shamadan tys arttyrǵany úshin 25 myń júrgizýshige aıyppul salyndy.

Atap aıtqanda, Reseı Federatsııasynda tirkelgen Kia Rio avtokóliginiń júrgizýshisi 84 ret jyldamdyqty asyrǵan. Sol úshin oǵan 1,2 mln teńge aıyppul tóleý kerektigi jóninde nusqama shyǵaryldy. Qazirgi kezde atalǵan kólik saqtandyrý polısi kelisimshartyn jasamaǵany úshin aqyly turaqqa qoıyldy.

Sol sekildi Reseıde tirkelgen Lexus avtokóliginiń júrgizýshisi 52 ret jyldamdyqty asyrǵany úshin 700 myńnan astam teńgeni tóleýge májbúr boldy.

Atalǵan kólikterdiń qalanyń keı jerlerinde jyldamdyqty saǵatyna 100 kılometrden asyrǵany belgili boldy.

BQO polıtsııa departamenti barlyq turǵyndardy jol erejesin qatań saqtaý kerektigin eske salady.

Eske sala keteıik, budan buryn Oralda 42 jastaǵy erkektiń qyzǵanyshtan ashynasyn óltirgenin jazǵan bolatynbyz.