Oralda jol salýdy keshiktirgen kompanııany sotqa bermegen aýyl ákimi aıyppul tóledi
ORAL. KAZINFORM - Oral qalasyna qarasty Jelaev aýylynda kóshe joly ýaqytyly jóndelmegeni anyqtaldy.
Zańger, BQO qoǵamdyq keńesiniń múshesi Baýyrjan Ahmetjannyń Facebook áleýmettik jelisindegi paraqshasynda málim etkenindeı, oǵan aýyl turǵyndary Abaı Kenjebekov pen Aınash Qýanova ákim men merdigerdiń zańsyz is-áreketi týraly aryzben júgingen.
Turǵyndardyń sózine qaraǵanda, jeri qazylyp, asty daıyndalyp, endi asfalt tóselýi tıis jolǵa (Birlik kóshesi 39, 39/1) jóndeý júrgizilmeı, ornyna basqa kóshe jasalǵan.
Goszakup.gov.kz portalynyń málimeti boıynsha bıylǵy 23 mamyrda Jelaev aýyldyq okrýginiń ákimi Arman Bısımbalıev pen «Oral joldary» AQ-nyń basshysy Aıdar Qurmanov shart jasaǵan.
- Aýyl kóshelerin aǵymdaǵy jóndeý jumysynyń quny 73 mln 223 myń teńgege baǵalanǵan. Aıaqtaý merzimi 2 shilde kúnine belgilengen. Alaıda jol salý jumysy ýaqytynda bitpegen. Sondaı-aq turǵyndardyń osy shaǵymyn Oral qalasy ákimi, prokýratýrasy ne qalalyq máslıhat depýtaty Konstantın Sveshnıkov te zerttemegen, daýǵa aralaspaǵan, is-áreketsizdik tanytqan, - deıdi zańger.
BQO boıynsha Іshki memlekettik aýdıt departamenti júrgizgen tekseris nátıjesinde zań buzylyp, merdigerdiń jumysty 41 kúnge keshiktirgeni anyqtaldy. Sol úshin «Oral joldary» bıýdjetke 1 mln 025,122 myń teńge turaqsyzdyq aıybyn tólegen.
Aýyl ákimi A.Bısımbalıev fırmany sotqa bermegeni úshin QR Ákimshilik quqyq buzýshylyq kodeksiniń 207-babymen kináli dep tanylyp, 58 980 teńge aıyppul tóledi. B.Ahmetjannyń pikirinshe, eger aýyl ákimi sotqa berse, fırma josyqsyz qatysýshy retinde tanylýy múmkin edi. Ondaı jaǵdaıda eki jyl boıy tenderge qatysa almaıdy.
- Biz shaǵymdanǵannan keıin úıimizdiń tusynda uzyndyǵy 30-40 metrdeı jolǵa asfalt qaldyqtaryn tósep tastady. K-700 traktorymen tapady, biraq katokpen tegistelgen joq. Jol oıly-qyrly, keı jeri juqa, keı jeri qalyń. Aýyl ákimi kelesi jyly asfalttalady deıdi. Ony da kútemiz. Ekinshi másele, qasymyzdaǵy zırattyń aldy oıpań, sondyqtan sý jınalady. Zıratqa kelip-ketýshiler úshin qıyn, - dedi aýyl turǵyny Abaı Kenjebekov.
Jelaev aýyldyq okrýginiń ákimi Arman Bısımbalıev keıbir ýájdermen kelispeıtinin bildirdi. Onyń málimdeýinshe, aǵymdaǵy jóndeý bolǵannan keıin joba jasalmaǵan.
- Men ózim jóndeý júrgizilip jatqan kezde barmap edim. Aýyldyq okrýg ákimdiginiń bólim basshysy ýchaske sheberine baryp aıtqan kezde ol túsinbeı, jumys baǵyty basqa kóshege burylyp ketken. Onda da 5-6 otbasy turady. Biz shart boıynsha merdigerdiń jumysty bitirý merzimi 31 jeltoqsan dep oıladyq. Jol ýaqytyly salynbaǵandyqtan, BQO boıynsha Іshki memlekettik aýdıt departamenti teksergennen keıin aıyppul tólegenim ras, - dedi aýyl ákimi.
Ol Birlik kóshesindegi eki turǵynnyń aryzyna qatysty túsinik berdi.
- Birlik kóshesindegi atalǵan eki úıden ári qaraı jol joq. Men sol kóshe turǵyny Aınash Qýanovamen sóılesip, aldaǵy jyly asfalt tóseý qarastyrylatyny jóninde kelistim. Al zıratqa qatysty aıtar bolsam, men ákim bolǵaly altynshy jylǵa aýdy, oǵan kelip-ketip jatqan adamdardy kórmedim. Kóktemde qar sýy Abaı Kenjebekovtiń aýlasynyń ishimen, zırattyń aldymen elevatorǵa qaraı ótedi. Zırattyń ishine sý kirmeıdi. Aǵymdaǵy jóndeý bolǵannan keıin sý ótkizetin qubyr salý kózdelmegen, - dep qosty A.Bısımbalıev.
Eske sala keteıik, budan buryn BQO-da jol qurylysy talaptaryn buzǵan kompanııaǵa 2,5 mln astam teńge aıyppul salynǵanyn jazǵan edik.