Oralda jol-kólik apatynan 8 adam zardap shekti
ORAL. QazAqparat – Oralda eki avtokólik túıisip, 8 adam jaraqat aldy, dep habarlaıdy QazAqparat tilshisi.
BQO Densaýlyq saqtaý basqarmasynyń baspasóz qyzmetinen málim etkenindeı, oqıǵa 3 qazan kúni keshkisin Derkól aýylynda boldy.
Jedel járdem saǵat 20.06-da shaqyryldy.
Aldyn ala málimet boıynsha, jol apaty saldarynan jabyq bas-mı jaraqatyn alyp, mıy shaıqalǵan bir jasar bala ájesimen birge oblystyq kópbeıindi balalar aýrýhanasyna jetkizildi.
Sondaı-aq taǵy 6 adam jabyq bas-mı jaraqatyn alyp, mıy shaıqalǵan. 35 jastaǵy er adamnyń oǵan qosa jambasy synǵan. 43 jastaǵy er adam omyrtqa tusynan synyq jaraqatyn alǵan. 27 jastaǵy er adamnyń sol jaq ıyǵy synǵan. Mas kúıinde bolǵan 30 jáne 31 jastaǵy er adamdar betinen, basqa da jerlerinen jaraqat alǵan. 31 jastaǵy áıel adam moıyn tusynan synyq jaraqatyn alǵan.
Ashyq bas-mı jaraqatyn alǵan 30 jastaǵy er adamnyń mıyna zaqym kelgen.
Eresek adamdardyń barlyǵy qalalyq kópbeıindi aýrýhananyń hırýrgııalyq bólimshesine jetkizildi.
BQO Polıtsııa departamentiniń resmı ókili Bolatbek Belgibekovtiń naqtylaýynsha, oqıǵa Derkól-Ósken tas joly boıynda oryn aldy.
VAZ-2114 jáne «Lada Prıora» avtokólikteri soqtyǵysty.
Qazirgi kezde osy oqıǵa boıynsha QR QK 345-babyna sáıkes sotqa deıingi tergeý amaldary júrgizilýde.
Eske sala keteıik, budan buryn Oralda avtokólikpen birge úsh balanyń sýǵa batyp ketkenin jazǵan bolatynbyz.
