Oralda jol erejesin 25 ret buzǵan 21 jastaǵy júrgizýshi jalǵan nómirmen júrgen
ORAL. KAZINFORM – Oral qalasynda uzaq ýaqyt boıy jol qozǵalysy erejesin buzyp, jaýapkershilikten jaltarmaqshy bolǵan júrgizýshi ustaldy.
BQO polıtsııa departamentiniń baspasóz qyzmetinen málim etkenindeı, qala kósheleriniń birinde sheteldik eseptegi Toyota Camry avtokóligi toqtatyldy.
Tekserý kórsetkenindeı, atalmysh kólik quralynyń 25 ret jol qozǵalysy erejesin buzǵany kameralarǵa túsip qalǵan. Oǵan qosa avtomobılde jalǵan memlekettik tirkeý nómirlik belgisi ornatylǵany anyqtaldy.
- 21 jastaǵy júrgizýshige kórineý jalǵan nemese qoldan jasalǵan memlekettik tirkeý nómirlik belgisi bar kólik quralyn basqarǵany úshin hattama toltyryldy. Bul bapqa sáıkes bir jyl merzimge kólik quralyn basqarý quqyǵynan aıyrýmen birge 5 táýlikke deıin qamaqqa alý jazasy qarastyrylǵan. Sonymen qatar jol erejesin buzýshylyqtyń 25 deregi boıynsha qaýly shyǵaryldy. Avtokólik arnaıy aıyp turaǵyna qoıylyp, is materıaldary mamandandyrylǵan ákimshilik sotqa joldandy, - dep habarlady vedomstvodan.
Eske sala keteıik, budan buryn BQO-da 4 700-den astam quqyq buzýshylyq anyqtalǵanyn jazǵan edik.