Oralda jol apatynda 5 adam zardap shekti
Oqıǵa 17 tamyz kúni saǵat 08.00-de Jelaev jolynda boldy. «VAZ-2112» jáne «Lada Granta» avtokólikteri soqtyǵysty.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jol apaty saldarynan 5 adam zardap shekti.
Jeńil dene jaraqatyn alǵan 11 jastaǵy qyz, 24 jáne 27 jastaǵy jigitter oblystyq aýrýhanaǵa jetkizildi. Dárigerler tıisti kómek kórsetip, ambýlatorııaǵa jiberdi. 13 jastaǵy qyz bala oblystyq kópbeıindi balalar aýrýhanasyna jetkizildi. 44 jastaǵy áıel bas pen mıdyń jabyq jaraqatyn alyp, tobyǵy synǵan. Ol oblystyq aýrýhananyń travmatologııa bólimshesine jatqyzyldy. Jaǵdaıy ortasha aýyr.
Túske qaraı avtobýs jeńil kólikke soǵyldy. Saǵat 10.56-da Abaı jáne N.Nazarbaev dańǵyldarynyń qıylysynda №2 baǵytpen júretin, 1953 jylǵy júrgizýshi aıdap kele jatqan «MAZ» avtobýsy burylý kezinde «Aýdı» avtokóligine soǵyldy. 20 jastaǵy júrgizýshi «Aýdımen» qarsy baǵytta kele jatqan.
Sonyń saldarynan avtobýstaǵy 1981 jylǵy jolaýshy áıel jeńil jaraqat aldy. Oblystyq aýrýhanada medıtsınalyq kómek kórsetilgennen keıin ambýlatorlyq em alýǵa jiberildi.
Bul oqıǵa boıynsha QR Ákimshilik quqyqbuzýshylyq kodeksi 610-babyna sáıkes hattama toltyryldy.
Eske sala keteıik, budan buryn Oralda avtobýs qaǵyp ketken jaıaý júrginshiniń jansaqtaý bólimine túskenin jazǵan bolatynbyz.