Oralda jol apatynan áıel adam qaza boldy
ORAL. QazAqparat - Oral qalasynda 14 tamyz kúni belgisiz bireý memlekettik nómiri joq «Raiser» mototsıklimen Dostyq dańǵyly men J.Dosmuhamedov kóshesiniń qıylysynda toqtap turǵan «Lada Granta» avtokóligimen soqtyǵysqan, dep habarlaıdy «QazAqparat» tilshisi.
BQO ishki ister departamenti baspasóz qyzmetinen túsken málimetke qaraǵanda, sonyń saldarynan mototsıklde otyrǵan 1982 jylǵy R. esimdi azamatsha oqıǵa ornynda qaza tapqan. Mototsıkl júrgizýshisi A. esimdi azamat Oral qalalyq kópbeıindi aýrýhanasynyń jan saqtaý bólimine jatqyzylǵan.
Qazirgi ýaqytta osy jol-kólik oqıǵasyna qatysty QR QK 345-baby 3-bólimine sáıkes qylmystyq is qozǵalyp, tergeý amaldary júrgizilýde.
Oqıǵaǵa qatysy bar adamdardyń sózine qaraǵanda, marqumnyń sońynda úsh balasy jetim qaldy. Oǵan qosa kúıeýi de bıylǵy naýryzda jol-kólik oqıǵasynan kóz jumǵan kórinedi.
Eske sala keteıik, budan bir kún buryn, 13 tamyz kúni keshki saǵat 21.00 shamasynda Oral-Atyraý kúre jolynyń 133-shaqyrymynda 1982 jylǵy júrgizýshi «Volksvagen Passat» avtokóliginiń sol jaq dóńgelegi isten shyǵýyna baılanysty qarsy betke shyǵyp ketip, 1970 jylǵy azamat aıdap kele jatqan «HYUNDAI SANTAFE» kóligimen soqtyǵysýǵa jol bergen bolatyn. Sonyń saldarynan «Volksvagen Passat» avtokóliginiń júrgizýshisi túrli dene jaraqattarymen Aqjaıyq aýdandyq aýrýhanasyna jetkizilse, ekinshi avtokóliktegi 1985 jylǵy azamatsha kóz jumdy.
