Oralda jol apatynan 8 adamnyń qaza tabýy boıynsha qylmystyq is qozǵaldy
BQO polıtsııa departamenti jergilikti polıtsııa qyzmeti basqarmasynyń bastyǵy, polıtsııa polkovnıgi Merhat Ájenovtiń brıfıngte málim etkenindeı, oqıǵa búgin saǵat 02.22-de aınalma jolda «VenOil» janar-jaǵarmaı stantsııasy mańynda boldy.
Onyń aıtýynsha, 1990 jylǵy júrgizýshi «Nissan Maxima» avtokóligimen basyp ozý kezinde qarsy betke shyǵyp ketken. Sonyń saldarynan 1982 jylǵy júrgizýshi aıdap kele jatqan «Lada 11183» avtokóligimen túıisýge jol bergen.
Saldarynan «Nissan Maxima» avtokóliginiń júrgizýshisi esin jııa almastan, oblystyq kópbeıindi aýrýhananyń jansaqtaý bóliminde kóz jumdy.
«Lada 11183» avtokóliginde bolǵan bes adam oqıǵa ornynda qaza tapty. Oǵan qosa 2011 jáne 2012 jylǵy eki bala oblystyq kópbeıindi balalar aýrýhanasynyń jansaqtaý bóliminde qaıtys boldy. Kólik quraldary arnaıy turaqqa qoıyldy. Qazirgi kezde QR QK 345-baby 4-bóligine sáıkes sotqa deıingi tergeý amaldary júrgizilýde. Birqatar saraptamalar taǵaıyndaldy», dedi M.Ájenov.
Oqıǵa ornyna BQO TJ departamenti jedel qutqarý jasaǵy da baryp, tıisti qyzmetin atqardy.
Eske sala keteıik, budan buryn Oralda kólik apatynan segiz adamnyń mert bolǵanyn jazǵan edik.