Oralda jol apatynan zardap shekken bes adamnyń bireýi jansaqtaý bóliminde jatyr

ORAL. KAZINFORM – Oral qalasynda eki avtokólik soqtyǵysyp, bes adam zardap shekti.

BQO polıtsııa departamentiniń baspasóz qyzmetinen málimetke qaraǵanda, oqıǵa 1 qarasha kúni túske taman N.Nazarbaev pen Abaı dańǵyldarynyń qıylysynda boldy.

«Reno Daster» avtokóliginiń júrgizýshisi solǵa qaraı burylǵan kezde «Lixiang L7» avtokóligine jol bermegen. Saldarynan «Reno Daster» avtokóliginiń júrgizýshisi men onda otyrǵan áıel oblystyq aýrýhana jetkizildi. Sonymen qatar «Lixiang L7» kóligindegi úsh kishkentaı bala aýrýhanaǵa tústi», dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, jedel járdemge shaqyrtý saǵat 12.18-de túsken. Oqıǵa ornynda úsh brıgada jumys istedi. 1958 jylǵy er adam oblystyq kópbeıindi aýrýhanada tekserýden ótkizildi. 1961 jylǵy áıeldiń jaǵdaıy aýyr, jansaqtaý bóliminde. Oblystyq kópbeıindi balalar aýrýhanasyna jetkizilgen 2022 jáne 2019 ul, 2021 jylǵy qyz balany dárigerler qaraǵannan keıin ambýlatorlyq em taǵaıyndaldy.

Eske sala keteıik, budan buryn Batys Qazaqstanda jol apatynan eki er adamnyń qaza tapqanyn jazǵan bolatynbyz.