Oralda joǵalyp ketken jigittiń máıiti ormannan tabyldy
ORAL. QazAqparat – Oralda joǵalyp ketken 21 jastaǵy jigittiń denesi ormanda asýly kúıinde tabyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen málim etkenindeı, marqumnyń múrdesi 25 jeltoqsan kúni saǵat 10.30-da Derkól kentindegi ormannan tabyldy.
«21 jastaǵy jigitke 24 jeltoqsan kúni izdeý salynǵan bolatyn. Ol 21 jeltoqsan kúni saǵat 22.00-de Derkól kentindegi úıinen shyǵyp ketkennen oralmaǵan edi. Múrde saraptamaǵa jiberildi. Qazirgi kezde QR QK 105-babyna (ózin-ózi óltirýge deıin jetkizý) sáıkes sotqa deıingi tergeý amaldary júrgizilýde», dep habarlady vedomstvodan.
Eske sala keteıik, budan buryn Oralda iz-túzsiz joǵalyp ketken 21 jastaǵy jigittiń úsh kúnnen beri izdestirilip jatqanyn jazǵan bolatynbyz.
