Oralda joǵalyp ketken 9 jasar bala aman-esen tabyldy
ORAL. QazAqparat – Oralda joǵalyp ketken 9 jasar bala aman-esen tabyldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekov málim etkendeı, balanyń joǵalyp ketkeni jóninde habar keshe saǵat 20.17-de túsken.
Jedel izdestirý sharalary barysynda patrýldik polıtsııa batalonynyń vzvod komandıri, polıtsııa aǵa leıtenanty Merbol Janǵalıev balany saǵat 21.13-te aman-esen taýyp aldy.
Balanyń anasy Nurgúl Sısenovanyń sózine qaraǵanda, uly saǵat 13.00-de ózderi turatyn Zachagan kentinen qalanyń ekinshi shetindegi Máskeý kóshesi boıynda ornalasqan oqýshylar saraıynda ornalasqan D.Eleýsinov atyndaǵy boks mektebine ketken.
Jattyǵýdan saǵat 17.00-de shyqqannan keıin úıine oralmaǵan. Ózderi jan-jaqqa habar salyp, izdegenmen, taba almaǵannan keıin polıtsııaǵa júgingen.
Balanyń ata-anasy uldaryn bir saǵatqa jetkizbeı tapqan polıtsııa qyzmetkerine alǵysyn jetkizdi.
