Oralda joǵalǵan bala tún ortasy aýa tabyldy
ORAL. QazAqparat - Oralda joǵalǵan bala tún ortasy aýa tabyldy, dep habarlaıdy QazAqparat tilshisi.
Oral qalasy polıtsııa basqarmasynyń baspasóz qyzmetkeri Gúlaman Ismaǵulovanyń aıtýynsha, oqıǵa keshe keshkisin oryn alǵan. Túngi saǵat 23.40-ta Samal kóshesi №115 mekenjaıynda turatyn áıel polıtsııaǵa habarlasyp, kishkentaı ulynyń úıge oralmaǵanyn aıtyp, kómektesýin surady.
Bala keshki saǵat 18.30 shamasynda kórshi balalarmen oınaýǵa ketken. Anasy onyń ústine qandaı kıim kıgenin sıpattap berdi. Sol boıynsha «Juldyz» shaǵynaýdanyna bet alǵan mektep ınspektory, polıtsııa aǵa leıtenanty Rýslan Ǵabdýalıev pen ýchaskelik polıtsııa ınspektory, polıtsııa leıtenanty Asylan Nyqbaev osy mańdy túgel aralap shyqty. Qyzmet kórsetetin aýmaqtaryna jaýapty eki ınspektordan bólek 15 tártip saqshysy, 4 túngi top quramyndaǵy polıtseıler birlese izdedi.
A.Nyqbaev pen R.Ǵabdýalıev 2011 jylǵy Hamıt esimdi balany úıilgen qumnyń ústinen tún ortasy aýa, saǵat 00.55-te tapty. Kishkentaı bala oınaǵan jerinde uıyqtap qalǵan. Denesi tońyp, oıanǵan Hamıt qasynda eshkim joǵyn kórip, qorqyp jylaǵan. Sol daýys boıynsha jetken qos tártip saqshysy balany úıine aparyp, ata-anasynyń qolyna tabystady.
Eske sala keteıik, budan buryn Oralda iz-túzsiz ketken 16 jastaǵy Azııa chempıony tabylǵan bolatyn.
