Oralda joǵalǵan bala aman-esen tabyldy
ORAL. QazAqparat - Oralda joǵalyp ketken 10 jasar bala aman-esen tabyldy, dep habarlaıdy QazAqparat tilshisi.
Ǵanı Ǵınııattyń apasy Lázzat Shaǵataıdyń aıtýynsha, qaladaǵy №47 orta mektepte oqıtyn bala keshe tústen keıin Gagarın aıaldamasyndaǵy órt sóndirý bóliminde jumys isteıtin ákesine tamaq aparamyn dep habarsyz ketken.
Qaladaǵy №7 baǵytpen qatynaıtyn avtobýsqa mingen Ǵanı uıyqtap qalyp, ózi bilmeıtin aýdannan túsip qalǵan. Telefonyn da úıde umyt qaldyrǵan.
«Tún qarańǵysynda adasyp jylap júrgenin kórgen tórt jigit baılanyp, urynǵysy kelip, sodan bala qashqan. Abyroı bolǵanda, orys keıýanaǵa kezigip, sol kisi dúkenge aparyp, tamaqtandyrǵan. Sosyn ájeı qazaq jigitine tabystap, amanattaǵan. Ol jigit aǵam Abzat Taıbaǵardyń jumysyna baryp, balasyn aman-saý jetkizipti. Aldymen bóten balaǵa qamqorlyǵyn aıamaǵan keıýanaǵa, sosyn qazaq jigitine, aty-jónin bilmesek te, alǵysymyzdy aıtqymyz keledi. Meıirimdi adamdar aınalamyzda kóp eken. Sonymen qatar bizdiń otbasymyzdaǵy jaısyz jaǵdaıǵa ortaqtasyp, birge izdeý salǵan jýrnalıst áriptesterim men barsha janashyr jandarǵa rızamyz», - dedi QazAqparat tilshisine Lázzat Shaǵataı.
