Oralda jylý qunyn qaıta eseptegennen keıin 3,4 mln teńge tutynýshylarǵa qaıtaryldy

ORAL. KAZINFORM – Batys Qazaqstan oblysynda 37 tabıǵı monopolııa sýbektisi 47 qyzmet túri boıynsha óz jumysyn atqaryp keledi.

Ulttyq ekonomıka mınıstrligi tabıǵı monopolııalardy retteý komıteti BQO boıynsha departamentiniń basshysy Gúljaz Qazbekovanyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 8-i uzaq merzimde tarıfter (bes jyldyq kezeń) boıynsha jumys isteıdi.

Gúljaz Jánibekqyzynyń sózine qaraǵanda, osy kásiporyndarda negizgi quraldardy jańǵyrtýǵa, rekonstrýktsııalaýǵa jáne jańartýǵa baǵyttalǵan, jalpy somasy 20 mlrd 657,26 mln teńge uzaq merzimdi ınvestıtsııalyq baǵdarlamar bekitilgen. Al 29-y qýattylyǵy az sýbektiler bolyp esepteledi.

Jyl basynan beri departamentke tarıfti bekitý jóninde 30 ótinim tússe, sonyń 23-i bekitilgen. Jeteýi keri qaıtarylǵan. Sondaı-aq ınvestıtsııalyq baǵdarlamalardy bekitý jáne burynǵylaryna ózgerister engizý jóninde 22 ótinim túsken. Sonyń 13-i bekitilip, bireýinen bas tartylǵan. Úsheýi keri qaıtarylsa, beseýi qaralý ústinde.

G.Qazbekovanyń aıtýynsha, «Tabıǵı monopolııalar týraly» Zań talaptaryna sáıkes syrtqy aýanyń naqty temperatýrasyn eskere otyryp, «Jaıyqjylýqýat» AQ-nyń jylýmen qamtý qyzmetiniń qunyn qaıta esepteý esebi qaraldy. Qaıta esepteý esepke alý aspaptary joq tutynýshylar úshin esepteledi.

- Qaıta esepteýden keıin 2024-2025 jyldardaǵy jylý berý kezeńinde «Jaıyqjylýqýat» AQ-nyń jylýmen jetkiliksiz jabdyqtaýǵa jol bergendigi anyqtaldy. Tutynýshylarǵa qaıtarylatyn qarajattyń jalpy somasy 3 mln 403 myń 037,22 teńge boldy. Nátıjesinde 2025 jylǵy qazan aıyndaǵy túbirtektegi tólemdi azaıtý arqyly qarjy tutynýshylarǵa qaıtaryldy, - dedi departament basshysy. 

Eske sala keteıik, budan buryn Oral qalasy jylytý maýsymyn apatsyz ótkize ala ma, sony jazǵan bolatynbyz.