Oralda jigitimen birge ózenge kelgen qyz sýǵa aǵyp ketti
ORAL. QazAqparat - Oralda 19 jastaǵy boıjetken sýǵa ketti, dep habarlaıdy QazAqparat tilshisi.
Oqıǵa keshe Komıntern kentindegi jaǵajaıda boldy.
BQO TJ departamenti jedel qutqarý jasaǵynyń baspasóz hatshysy Aıagóz Qojanbaevanyń aıtýynsha, 1999 jylǵy qyz jigitimen birge Jaıyq ózeninde shomylyp júrgen. Ókinishke qaraı, ekeýi de júzý bilmeıdi eken. Bul jerde ózenniń aǵysy da qatty.
Oqys oqıǵa oryn alǵanda, eriktiler qutqarýshylardy kómekke shaqyrǵan. Olar oqıǵa ornyna úsh mınýttan keıin jetip, 10 mınýttan soń marqumnyń denesin shyǵaryp aldy.
Aıta keteıik, bul - bıylǵy osyndaı ekinshi oqıǵa. Budan buryn qalaǵa qarasty Serebrıakov kentindegi Sát kóline er adamnyń batyp ketkenin jazǵan bolatynbyz.
Jalpy, BQO TJ departamentiniń málimetine qaraǵanda, oblysta 2015 jyly 30 adam, 2016 jyly 20 adam sýǵa ketti. Ótken jyly 18 adam «tilsiz jaýdyń» qurbany bolsa, sonyń beseýi - balalar.
