Oralda jeti apattyq úıdi buzyp, ornyna jańasyn salý kózdelýde
ORAL. QazAqparat - Bıyl Oral qalasynda jeti apattyq úıdi buzyp, ornyna jańasyn salý kózdelýde, dep habarlaıdy «QazAqparat» tilshisi.
Qala ákiminiń orynbasary Altynbek Qaısaǵalıev sondaı ǵımarattyń biri - Nekrasov kóshesi 22-úı turǵyndarymen kezdesti. Bul ǵımarat 1861 jyly, ıaǵnı bir jarym ǵasyrdan astam ýaqyt buryn salynǵan.
«Batys Qazaqstan qurylys materıaldary korporatsııasy» AQ basshylyǵynyń qatysýymen ótken jıyn barysynda memlekettik-jekeshelik áriptestik baǵdarlamasy aıasynda apattyq jáne eski úılerdi buzyp, olardyń ornyna jańasyn salý máselesi talqylandy. Kezdesý qorytyndysynda turǵyndar men kompanııa ókilderi atalǵan úıdi buzyp, ornyna jańadan bes qabatty turǵyn úı salý týraly kelisimge keldi.
«Batys Qazaqstan qurylys materıaldary korporatsııasy» AQ bas dırektory Muhametjan Kenjeǵulovtyń aıtýynsha, atalmysh úıde 12 otbasy turady eken. Qujattary túgeldenip, bári zańǵa sáıkes bolsa, kompanııa iske kirisýge daıyn.
Qala ákiminiń orynbasary A.Qaısaǵalıev budan buryn «Bolashaq-T» JShS qurylys kompanııasy ókilderiniń qatysýymen Depovskaıa kóshesindegi 2/6, 2/7, 2/8 mekenjaıyndaǵy apatty úılerdiń turǵyndarymen osyndaı kezdesý ótkizgen bolatyn.
Aıta keteıik, Oralda apatty dep tanylǵan 43 úı bar. Memlekettik-jekeshelik áriptestik aıasynda 2015 jyldan bastap osyndaı úılerdi buzý jáne qaıta salý jobasy qolǵa alyndy. Buǵan deıin jeti úı buzylyp, sonyń ornyna salynǵan alǵashqysy ótken jyly paıdalanýǵa berildi.
