Oralda jergilikti úlesti arttyrý baǵytynda kelisimderge qol qoıyldy
Alpysqa jýyq otandyq kásiporyn ókilderi qatysqan jıynda Batys Qazaqstan oblysynyń ákimi Altaı Kólginovtiń atap ótkenindeı, óndiris oshaqtary shoǵyrlanǵan óńirge sheteldik ınvestorlardyń kóptep keletini belgili. Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes ekonomıkany tehnologııalyq jaǵynan jedel jańǵyrtý baǵytynda ındýstrııalandyrýdy órge bastyryp, barlyq salada básekege qabiletti ónim óndirýdiń mańyzy zor. Munaı-gaz kesheniniń óńir ekonomıkasyndaǵy jetekshi ornyn eskere otyryp, bul salany sapaly taýar, jumys jáne qyzmetpen qamtı bilý kerek. Qazirgi zamanǵy qural-jabdyqtar ornatylǵan, bilikti mamandary bar kompanııalar oblysta joq emes, bar. Sondyqtan mundaı kezdesýler «QPO b.v.» kompanııasynyń júrgizip otyrǵan jumysynan, jańa jobalary men talaptarynan otandyq ónim óndirýshilerdi aldyn ala habardar etedi. 
QR energetıka birinshi vıtse-mınıstri Mahambet Dosmuhambetov Elbasynyń iri kásiporyndarda jergilikti qatysý deńgeıin arttyrý jónindegi tapsyrmasy eń aldymen jer qoınaýyn paıdalanýshylarǵa baǵyttalǵanyn jetkizdi. Bul rette otandyq kompanııalar ozyq tehnologııalardy engizip, básekege qabiletti taýar óndirý men qyzmet kórsetýdi ıgere bilýi tıis.
«QPO b.v.» kompanııasynyń bas dırektory Renato Marolı Qarashyǵanaq kenishin ıgerýdegi aǵymdaǵy jumystar, sondaı-aq jergilikti taýar óndirýshilerdi qoldaý baǵytyndaǵy bastamalar jóninde áńgimeledi. Qazirgi kezde kompanııa jergilikti kásiporyndardy kúrdelirek jumystarǵa tartýǵa baǵyt ustanýda. Jyl basynda «QPO b.v.» birneshe tenderdi aıaqtasa, onda sheteldik jáne qazaqstandyq munaı kompanııalary arasynda birlesken kásiporyn qurý talap etildi. Sonyń nátıjesinde tehnolgııalyq jaǵynan kúrdeli burǵylaý jumystaryn júrgizetin úsh birlesken kásiporyn qurylyp, tıisti kelisimder jasaldy.
Forýmda sondaı-aq «Oral» ÁKK» UK» AQ basqarma tóraǵasy Erjan Baltaev, «Qazservıs» munaı-servıstik kompanııalar odaǵynyń bas dırektory Nurlan Jumaǵulov, «QPO b.v.» kompanııasynyń ókilderi Batys Qazaqstan oblysynda ındýstrııalyq aımaq pen mashına jasaý kishi klasteriniń damýyna baılanysty jańa múmkindikter, jer qoınaýyn paıdalanýshylardyń satyp alýlarynda jergilikti úlesti damytý joldaryna toqtaldy. Qarashyǵanaq kenishin keńeıtý jobasyn júzege asyrýda aldaǵy ýaqytty osy múmkindikterdi barynsha paıdalaný qajettigi aıtyldy.
Jıyn sońynda jergilikti qamtýdy damytýǵa yqpal etetin «QPO b.v.» kompanııasy, BQO ákimdigi, «Oral» ÁKK» UK» AQ jáne oblystyq munaı-gaz kishi klasteriniń qatysýshylary arasynda tıimdi qarym-qatynasty qamtamasyz etý týraly memorandýmǵa qol qoıyldy. Sonymen qatar oblystyq ákimdik pen «QPO b.v.» kompanııasy arasyndaǵy jergilikti qamtý boıynsha maqsatty kórsetkishterdi anyqtaýǵa oraı ózaratúsinistik týraly kelisimge qol qoıyldy.
