Oralda jer ýchaskelerin satý boıynsha kezekti aýktsıon ótti

ORAL. QazAqparat - Búgin Oralda aýyl sharýashylyǵy maqsatyndaǵy jáne kommertsııalyq baǵyttaǵy jer telimderin jaldaý quqyǵyn satý boıynsha kezekti aýktsıon ótkizildi, dep habarlaıdy QazAqparat tilshisi.

Qala ákimdiginde ótken aýktsıonǵa 9 jer telimin jaldaý quqyǵy shyǵaryldy. Alaıda, olardyń bireýi ótinish bildirýshiniń bolmaýyna baılanysty ótpedi. Qalǵan segizi satyldy.

Oral qalasy jer qatynastary bóliminiń basshysy Arman Bısımbalıevtiń aıtýynsha, jer telimderi ǵımarat qurylysy men oǵan qyzmet kórsetýge, sondaı-aq jarnamalyq nysandar ornalastyrýǵa arnalǵan.

Segiz jer telimi boıynsha barlyǵy 21 azamattan 52 ótinish tústi. Aǵylshyndyq ádispen ótken aýktsıon barysynda Oral-Jelaev tas joly boıynda 17-qurylys mekenjaıyndaǵy 20 sotyq jer telimi (bastapqy quny - 327 600 teńge) 17,5 mln teńgege satyldy. Sol sekildi Zachagan kenti Aıtqulov kóshesi boıyndaǵy 25 sotyq jer (bastapqy baǵasy - 409 500 teńge) 17 mln 150 myń teńgege ótti.

Bul - bıylǵy úshinshi, ótken jyldan bergi besinshi aýktsıon. Osylaısha, ótken jyldan bergi aýktsıondar barysynda 35 jer telimin jaldaý quqyǵy satylyp otyr. Munyń aldyndaǵy 27 jer ýchaskesi boıynsha 100 mln astam teńge tústi.

Qazirgi tańda jer alǵandardyń arasynda dúken salyp, paıdasyn kóre bastaǵandary bar.

Jerdi jaldaý quqyǵyn satyp alǵandar ony úsh jyl ishinde maqsatty paıdalanyp, ıgerse, kadastrlyq qunyn qosa tólep, jekemenshikke aýdara alady. Olaı bolmaǵan jaǵdaıda jer telimi memleketke qaıtarylady.

Eske sala keteıik, budan buryn Oralda jer telimderin jaldaý quqyǵy 28,2 mln teńgege satylǵanyn jazǵan bolatynbyz.