Oralda jer telimin jaldaý quqyǵy 20 mln teńgege satyldy
ORAL. QazAqparat - Oral qalasynda búgin bes jer telimi aýktsıonda satylymǵa shyǵaryldy, dep habarlaıdy «QazAqparat» tilshisi.
Oral qalasy ákimdiginen túsken málimetke qaraǵanda, bul - kommertsııalyq baǵyttaǵy nysandar qurylysy úshin jer telimin jaldaý quqyǵyn aǵylshyndyq ádispen satý boıynsha ótkizilgen bıylǵy birinshi aýktsıon.
Satylymǵa Oral qalasynan jáne Krýgloozernyı men Zachagan kentterinen jer telimderi usynyldy. Aýktsıonǵa bes lot boıynsha 71 ótinish túsip, 41 adam qatysty.
Aýktsıon qorytyndysyna sáıkes satylǵan jer teliminiń eń tómengi quny 4 mln teńge bolsa, bireýi 20 mln 30 myń teńgege ótti. 
Eske sala keteıik, 2017 jyly osyndaı eki aýktsıon uıymdastyrylǵan bolatyn. Sonyń ishinde jeltoqsan aıynda ótken sharada bir jer telimin oraldyq kásipker 16 mln teńgege satyp alǵan edi.
