Oralda jer telimderin jaldaý quqyǵy 28,2 mln astam teńgege satyldy

ORAL. QazAqparat  - Búgin Oral qalasy ákimdiginde kommertsııalyq baǵyttaǵy nysandar qurylysy úshin jer telimin jaldaý quqyǵyn satý boıynsha aýktsıon ótkizildi, dep habarlaıdy QazAqparat tilshisi.

Aýktsıonǵa barlyǵy 10 jer telimi qoıylǵanymen, bireýi boıynsha bir ǵana adamnan ótinish túskendikten, ol lot ótpedi.

Oral qalasy jer qatynastary bóliminiń basshysy Arman Bısımbalıevtiń aıtýynsha, toǵyz jer telimin jaldaý quqyǵy 28,232 mln teńgege satyldy. Sonyń ishinde Zachagan kenti Q.Jumalıev kóshesindegi 0,15 ga jer telimi eń qymbatqa (5 mln astam teńge) tústi. Sondaı-aq osy kentte Jáńgir han kóshesi boıyndaǵy 2 gektar jerdi jaldaý quqyǵy 3,6 mln teńgege satyldy.

Aıta keteıik, ótken jyldan beri Oral qalasynda úsh aýktsıon, bir konkýrs ótkizilip, odan 72,3 mln teńge tústi.

Jer telimin satyp alǵandar ony úsh jyl ishinde maqsatty paıdalanyp, ıgerse, kadastrlyq qunyn qosa tólep, jeke menshigine aýdara alady. Olaı bolmaǵan jaǵdaıda jer telimi memleketke qaıtarylady.

Oralda 10 jer telimi aýktsıonǵa qoıylǵanyn budan buryn jazǵan bolatynbyz.