14:17, 30 Naýryz 2025 | GMT +5
Oralda jeńil kólik qaǵyp ketken áıel kóz jumdy
ORAL. KAZINFORM — Oral qalasynda jol-kólik oqıǵasynan áıel adam mert boldy. BQO polıtsııa departamentiniń baspasóz qyzmetinen málim etkenindeı, oqıǵa 29 naýryz kúni shamamen 22.10-da boldy.

Júrgizýshi «Aýdı 80» avtokóligimen Jáńgir han kóshesi boıynda Shaǵan ózeninen ótetin kópir mańynda áıel adamdy qaǵyp ketken.
— Marqum jedel járdem kóligi kelgenge deıin kóz jumdy. Oqıǵa ornynda polıtsııa qyzmetkerleri jumys istedi. Qazirgi kezde oqıǵanyń mán-jaıy anyqtalý ústinde. QR QK 345-baby 3-bóligine sáıkes qylmystyq is qozǵalyp, tergeý amaldary júrgizilýde, — dep habarlady vedomstvodan.
Eske sala keteıik, budan buryn BQO-da aýdan ákimdiginde tóbeles kezinde aýyr jaraqat alǵan er adamnyń palataǵa shyǵarylǵanyn jazǵan edik.