Oralda Jeńis alańy qaıta jańǵyrtyldy
Oblys ákimi Ǵalı Esqalıev óńirdegi soǵys ardagerleri men tyl eńbekkerlerin onlaın baılanys arqyly quttyqtady.
«Jeńis kúniniń bárimiz úshin orny bólek, mán-mańyzy aıryqsha. Bul – aǵa urpaqtyń erligin máńgilik el esinde saqtaýǵa septesetin qasterli mereke. Qurmetti ardagerler, sizderdiń arqalaryńyzda biz táýelsiz Qazaqstanda beıbit ómir súrýdemiz. Bul – qan maıdanda paryz ben namys úshin, eliniń bostandyǵy úshin jan aıamaı soǵysqan jáne tylda tynymsyz eńbek etken aǵa-apalarymyzdyń eren erligi men bıik rýhyn áıgileı túsetin kún. Sonymen qatar Jeńis úshin ómirin qıǵan jaýyngerlerdi eske alý kúni», dedi óńir basshysy.
Ǵ.Esqalıev Tasqala aýdanynda turatyn maıdanger, bıyl 97 jasqa tolǵan Rabıǵa Zaınýllınany arnaıy quttyqtap, izgi tilegin bildirdi.
Onlaın baılanysqa oblysta turatyn elýge jýyq maıdanger qatysty.
Maıdangerler Qalam Súıinshálıev, Ivan Gapıch, tyl eńbekkeri Merýert Joldyqaıyrova jáne basqalary Uly Jeńistiń ońaılyqpen kelmegenin, talaı bozdaqtyń qan maıdannan oralmaǵanyn aıtyp, qazirgi tańda memleket tarapynan ardagerlerge jasalyp otyrǵan qoldaý-kómek úshin rızashylyǵyn bildirdi.
Soǵys ári prokýratýra ardageri I.Gapıch 1945 jyly Máskeýde ótken Jeńis sherýine qatyssa, M.Joldyqaıyrova – sol jyldyń 9 mamyry kúni tańǵy 6-da Jeńis habaryn oblystyq radıodan dıktor retinde óńir halqyna qýana jetkizgen zeınetker-ustaz.
Ekinshi dúnıejúzilik soǵysqa Batys Qazaqstan oblysynan 76265 adam qatyssa, sonyń 36548-i maıdannan oralmady. Qyryqqa jýyq adam Keńes Odaǵynyń Batyry atansa, altaýy Dańq ordeniniń tolyq ıegeri atandy.
Bıyl merekege oraı Oraldaǵy Jeńis alańy qaıtadan jańǵyrtyldy. Dańq memorıalynda batysqazaqstandyq sarbazdardyń esimderi men sýretteri jańadan bezendirilse, «Tyl eńbekkerlerine taǵzym» barelefi de erekshe kóz tartady. Alleıalarǵa qoıylǵan aqparattyq taqtalarda batysqazaqstandyqtardyń Jeńiske qosqan úlesi, soǵystyń negizgi oqıǵalary týraly málimetter jazylyp, sýretter beınelengen. Al áskerı tehnıkalar murajaıynan 1941 jyly Lenıngradtan Oralǵa kóshirilgen №231 zaýyt (qazirgi «Zenıt» zaýyty) shyǵarǵan «polýtorka» atalyp ketken júk kóligi, sý asty mınasy men torpedo úlgilerin kórýge bolady.
Búgin osy Jeńis alańynda saltanatty jıyn bolyp, onda jınalǵandardy qala ákimi Abat Shynybekov quttyqtady.
Máńgilik alaý men eskertkishterge gúl shoqtary qoıylyp, maıdangerlerge qurmet kórsetildi.
Elý sportshydan turatyn merekelik velosherýge qatysýshylar qala kóshelerimen tuńǵysh Prezıdent alańyna deıin saltanatpen júrip ótti.
Ónerpazdar men shyǵarmashylyq ujymdar arnaıy avtokólikpen ardagerler turatyn úılerdiń aýlalaryna baryp, kontsert qoıdy. Qalalyq mádenıet jáne demalys saıabaǵynda da merekelik sharalar kórinis tapty.
