Oralda jeltoqsan aıynda karantın tártibi 49 márte buzylǵan

ORAL. QazAqparat – Oral qalasynda nysandarǵa monıtorıng júrgizý barysynda jeltoqsan aıynda 49 karantın talabyn buzý faktisi tirkeldi, dep habarlaıdy QazAqparat.

Qala ákimi Abat Shynybekovtiń oblystyq jedel shtab otyrysynda málim etkenindeı, sonyń beseýi nysandardyń jumys rejımin buzýǵa qatysty bolsa, 44-i turǵyndar tarapynan oryn alǵan.

Barlyq buzýshylyqtar tirkelip, tıisti shara alý úshin Oral qalasy sanıtarlyq-epıdemıologııalyq baqylaý basqarmasyna joldandy.

Sonymen qatar avtobýstar da tekserilýde. 1-7 jeltoqsan aralyǵynda eki derek anyqtalyp, bul boıynsha da tıisti shara alynatyn bolady.

Áleýmettik jeliler men gazetterdegi habarlandyrýlarǵa monıtorıng júrgizý barysynda «Siberia» restobarynyń túngi mezgilde de jumys istep kelgeni belgili boldy.

Jalpy, qyrkúıek aıynan beri 224 materıal qaralyp, sonyń nátıjesinde 8,6 mln astam teńgege 119 hattama jasaldy.

Mamandandyrylǵan aýdanaralyq ekonomıkalyq sottyń qaýlysymen «Gákký», «Marsel» kafeleri men «Aızat» banket zaly, «Albına+», «Maqpal», «Adelıa» meıramhanalary úsh aı merzimge jabyldy.

Jedel shtab otyrysyna tóraǵalyq etken oblys ákimi Ǵalı Esqalıev óńirde jaǵdaıdyń áli kúrdeli ekendigin, sondyqtan indet órship ketken jazdaǵy jaǵdaıdyń qaıtalanýy múmkin ekendigin jetkizdi. Sondyqtan monıtorıngtik toptardyń jumysy jalǵasady. Barlyq memlekettik organdarda jańajyldyq is-sharalardy ótkizýge tyıym salyndy. Jeke mekemeler men turǵyndar da óz qaýipsizdigi úshin shekteý sharalaryn buzbasa, indettiń aldyn alýǵa bolady.

Eske sala keteıik, budan buryn Batys Qazaqstanda jeltoqsan aıynda 700-den astam adamnyń koronavırýs juqtyrǵanyn jazǵan bolatynbyz.