Oralda jeldiń áserinen taǵy bir adam jaraqat aldy
ORAL. QazAqparat - Oralda kúshti jeldiń áserinen taǵy bir adam jaraqat aldy, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, keshe Almaty kóshesinde úıdiń tóbesinen proflıst qulap, 37 jastaǵy er adamnyń basynan soqqan. Jabyq bas-mı jaraqatyn alyp, mıy shaıqalǵan er adam qalalyq kópbeıindi aýrýhanaǵa jetkizildi.
Aldyn ala málimetterge qaraǵanda, qalada sondaı-aq №43 jáne №45 orta mekteptiń, A.Imanov atyndaǵy jol-kólik kolledji jáne basqa ǵımarattardyń shatyrlarynyń bólikteri ushqan. Terekter qulap, elektr jelileri úzildi.
Oblys aýdandarynda da osyndaı oqıǵalar boldy. Qazirgi kezde qalpyna keltirý jumystary júrgizilýde.
BQO TJ departamentiniń baspasóz qyzmeti shyǵyndar eseptelip jatqanyn, tolyq málimet keıin beriletinin jetkizdi.
Eske sala keteıik, keshe qatty jeldiń saldarynan 10 jasar qyzdyń jaraqat alǵanyn jazǵan bolatynbyz.
