Oralda «Jelaev astyq ónimderi kombınaty» AQ-nyń ǵımaraty órtendi
ORAL. QazAqparat -Oralda «Jelaev astyq ónimderi kombınaty» AQ-nyń úsh qabatty ákimshilik ǵımaraty órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen alynǵan málimetke qaraǵanda, Oral-Jelaev joly boıynda ornalasqan kombınatta saǵat 21.04-te ekinshi qabattaǵy asúı (aýmaǵy 50 sharshy metr) otqa orandy.
Órt sóndirýshiler kelgenge deıin nysandaǵy memlekettik emes órtke qarsy qyzmet kúshimen 15 adam evakýatsııalandy.
Órt 22.02-de oqshaýlanyp, 22.21-de sóndirildi. «Tilsiz jaýdy» aýyzdyqtaýǵa 55 adam, 15 tehnıka jumyldyryldy.
Aldyn ala málimet boıynsha ot elektr quraldaryn paıdalaný kezinde órt qaýipsizdigin saqtamaýdan shyqqan.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa ornyna jedel járdem saǵat 21.10-da shaqyryldy.
Tórt brıgada jumys jasady. Qalalyq kópbeıindi aýrýhanaǵa úsh adam jetkizildi.
Eske sala keteıik, budan buryn Oralda kólik jýatyn oryn otqa oranǵan bolatyn.
