Oralda jel kúsheıse, jaryq ta óshedi: turǵyndar shaǵymyna ákimdik jaýap berdi

ORAL. KAZINFORM — Oblys ortalyǵy Oral qalasynda qolaısyz aýa raıyna baılanysty turǵyndardan túsetin shaǵym da kóbeıdi.

Instagram áleýmettik jelisinde Zachagan kentine qarasty «Arman» shaǵynaýdany turǵyndary 4 qańtar kúni málim etkenindeı, jel kúsheıip, qar nemese jańbyr jaýsa da, elektr jaryǵy sónedi.

- HHІ ǵasyrda ómir súrip jatyrmyz. Alaıda sál jaýyn-shashyn bolsa-aq, qarańǵylyq qushaǵynda qalamyz. Úıde balalar, qart adamdar bar, kerneýdiń jıi-jıi kóterilýinen tehnıka da synady. Elektr jelileri ábden tozǵan, bul ýaqytsha sharalar emes, kúrdeli jóndeýdi qajet etedi. Elektr qýaty úshin turaqty tóleımiz, sondyqtan sapaly qyzmet alǵymyz keledi, - deıdi turǵyndar.

Turǵyndar qalanyń basqa aýdandarynda da osyndaı jaǵdaıǵa jıi tap bolatynyn aıtady. Zachagan kentinde 5 qańtar kúni de jaryq óship, qaıta jandy.

Osyǵan oraı Kazinform tilshisiniń saýalyna Oral qalasy ákimdigi jaýap berdi.

Ákimdik málimetine qaraǵanda, «Arman» shaǵynaýdanynda 4 qańtar kúni elektr qýaty tolyq kólemde óshirilmegen. Tek keıbir aýmaqtarda aýa raıynyń qolaısyzdyǵyna baılanysty ajyratý oryn alǵan. «Batys Qazaqstan aımaqtyq elektr jelilik kompanııasy» JShS tarapynan tıisti jumystar júrgizilip, keıin elektrmen jabdyqtaý tolyq qalpyna keltirilgen.

BQO energetıka, turǵyn úı-kommýnaldyq sharýashylyq basqarmasynyń derekterine sáıkes óńirde ártúrli kerneý klasyndaǵy elektr jetkizý jelileriniń jalpy uzyndyǵy 20 531 km bolsa, transformatorlyq qosalqy stantsııalardyń sany – 3 183.

2025 jyly «Batys Qazaqstan aımaqtyq elektr jelilik kompanııasy» JShS-nyń elektr jelilerinde 458 ajyratý tirkelse, sonyń 170-i Oral qalasynyń úlesine tıedi. Elektrmen jabdyqtaý salasynda 1 869 qyzmetker eńbek etedi, 321 avtokólik bar.

Oblysta elektr jelileriniń ortasha tozýy ótken jyl basyndaǵy 78,86 paıyzdan jyl sońynda 75,43 paıyzǵa deıin kemidi.

Elektr jelileriniń senimdiligin arttyrý maqsatynda 2025 jyly 1 023 km áýe jelisi, 22 qosalqy stantsııa jóndelip, 3 904 tirek aýystyryldy. Apattyq ýchaskelerde qosymsha kúsheıtý jumystary júrgizildi.

«Aýyl – el besigi» memlekettik baǵdarlamasy aıasynda 3 joba iske asyryldy.

Atap aıtqanda, Bórli aýdany Býmakól, Tasqala aýdany Mereı aýylynda jáne Syrym aýdany Jympıty aýylynda Alash Orda kóshesindegi elektr jelileri rekonstrýktsııalandy. «Jylýenergetıkalyq júıesin damytý» baǵdarlamasy aıasynda «110 kV áýe jelilerin rekonstrýktsııalaý (Aqjaıyq, Báıterek, Tasqala aýdandary jáne Oral qalasy)» jobasy iske asyrylyp jatyr.

- Sonymen qatar 31,3 km bolatyn «110/10 kV Aqjaıyq qosalqy stantsııasynan 10 kV taratý pýnktteri men 10/0,4 kV transformatorlyq qosalqy stantsııalaryna deıingi 10 kV taratý elektr jelilerin salý» jobasy aıaqtaldy. 2025–2026 jyldarǵa arnalǵan «Energetıka jáne kommýnaldyq sektorlardy jańǵyrtý» ulttyq jobasy aıasynda jalpy quny 10 mlrd teńge bolatyn 3 joba júzege asyrylypkeledi. 2026 jylǵa ınvestıtsııalyq baǵdarlama boıynsha 640 mln teńge qarastyrylyp, 3 982 km 0,4–35 kV áýe jáne kabel jelilerin jáne 3 qosalqy stantsııany qamtıtyn jumystar josparlanǵan. Oǵan qosa «Energetıka jáne kommýnaldyq sektorlardy jańǵyrtý» ulttyq jobasy aıasynda jalpy quny 231 mlrd teńge bolatyn 14 jobaǵa ótinimder tapsyryldy, - delingen resmı málimette.

Eske sala keteıik, budan buryn Batys Qazaqstanda energetıkalyq qaýipsizdikti qalaı qamtamasyz etýge bolatynyn jazǵan edik.