Oralda jeke menshikke berilgen jer 14 jyldan keıin memleketke qaıtaryldy
ORAL. KAZINFORM — Oral qalasyndaǵy Eski áýejaı shaǵynaýdanynda ornalasqan 3,3 gektar jer kezinde jekege berilgen.
Zańger, BQO qoǵamdyq keńesiniń múshesi Baýyrjan Ahmetjannyń Facebook áleýmettik jelisindegi paraqshasynda málim etkenindeı, atalǵan jerdiń kadastrlyq quny 52 mln 010,4 myń teńge bolsa, naryqtaǵy baǵasy — 1 mlrd 667 mln teńge.
Onyń sózine qaraǵanda, qaladaǵy 1 sharshy metr jerdi jeke menshikke berý baǵasy oblys ákimdiginiń qaýlysymen 1 560 teńge bolyp bekitilgen. Al onyń jeke saýdadaǵy quny 50 myń teńge turady, ıaǵnı 32 ese qymbat.
2011 jyly 1 jeltoqsanda «Oil Real Estate» JShS (Almaty qalasy) ákimdikten atalǵan jerdi qonaq úı, ákimshilik, saýda-oıyn-saýyqtyrý ǵımaratynyń qurylysy úshin alǵan. 2014 jyly 24 qazanda ákimdik jer teliminiń maqsatyn kóp qabatty turǵyn úıler qurylysyna aýystyryp bergen.
— Men 2022 jyly «Ádildik joly» qoǵamdyq birlestiginde qyzmet etkende, jerdiń bos turǵanyn, ıgerilmegenin, Jer kodeksi talabynyń buzylǵanyn kórip, BQO jer resýrstaryn basqarý departamentiniń Berik Esenǵalıevke aryz jazdym. Olar tekseris jasap, JShS-ge 2023 jylǵy 2 qarashaǵa deıin jerdi ıgerý týraly nusqama berdi. Oryndamaǵan soń, departament sotqa jerdi keıin qaıtarý týraly shaǵym túsirdi, — deıdi Baýyrjan Ahmetjan.
Onyń aıtýynsha, BQO mamandandyrylǵan ákimshilik sotynyń sýdıasy Sabyrjan Esjanovtyń 2025 jylǵy 13 mamyrdaǵy sheshimimen talap aryz qanaǵattandyryldy. Memleket menshigine májbúrlep alý týraly sheshimdi ádilet departamenti atqardy.
Osy máselege oraı Kazinform tilshisi Oral qalasy ákimdigine arnaıy saýal joldaǵan edi.
Ákimdik «Ádildik joly» RQB BQO fılıalynyń 2022 jylǵy 8 qyrkúıektegi ótinishi negizinde Oral qalasynda Alash pen M.Abdolov kósheleriniń qıylysynda ornalasqan jalpy kólemi 3,3340 ga jer telimine qatysty BQO jer resýrstaryn basqarý departamenti tarapynan tekserý júrgizilgenin rastady.
— Tekserý nátıjesinde Jer kodeksi 65-babynyń talaptary buzylǵany anyqtaldy. Atap aıtqanda, jer teliminiń nysanaly maqsatyna sáıkes ıgerilmegeni belgili boldy. Osyǵan baılanysty 2022 jylǵy 2 qarashada menshik ıesine № 174 nusqama berilip, onda jer telimin 2023 jylǵy 2 qarashaǵa deıin nysanaly maqsatyna sáıkes ıgerý mindeti júkteldi. Alaıda kórsetilgen merzimge deıin jer telimi ıgerilmegen. Osyǵan baılanysty Batys Qazaqstan oblysy mamandandyrylǵan ekonomıkalyq sotynyń sheshimimen atalǵan jer telimi memleket menshigine qaıtaryldy, — delingen resmı jaýapta.
Eske sala keteıik, budan buryn BQO-da zań buzǵan jol salýshy kompanııanyń 19,7 mln teńgeni memleketke qaıtarǵanyn jazǵan bolatynbyz.