Oralda jedel járdem kóligi aýdaryldy
ASTANA. QazAqparat - Oralda dárigerler men naýqastar bar jedel járdem kóligi aýdaryldy. Jol apaty 13 qazanda keshki saǵat 20.30-da Qurmanǵazy men Dáýletkereı kósheleriniń qıylysynda bolǵan, dep habarlaıdy QazAqparat «Moı GOROD » saıtyna silteme jasap.
«Lada Prıora» júrgizýshisiniń aıtýynsha, ol Dáýletkereı kóshesiniń boıymen bara jatyp, Qurmanǵazy kóshesiniń qıylysynda jedel járdem kóligine soǵysqan. Jedel járdem mashınasy Qurmanǵazy kóshesiniń boıymen oblystyq ІІD ǵımaraty jaǵyna qaraı bara jatqan.
«Jedel járdem kóligi qatty jyldamdyqpen sırenasyz bara jatty, - dep habarlady «Prıora» júrgizýshisi. - Ekeýmiz soǵysyp, jedel járdem aýdarylyp ketti. Jedel járdem kóliginde júrgizýshiden bólek, feldsher, dáriger jáne eki naýqas boldy. Olardy jedel járdem alyp ketti».
«Prıora» júrgizýshisi men jolaýshysy zardap shekpegen. Oqıǵanyń mán-jaıy anyqtalyp jatyr.
