Oralda jazýshy-jýrnalıst Sara Latıevanyń shyǵarmashylyq keshi ótti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda Almatyda turatyn qalamger, Qazaqstan Jazýshylar jáne Jýrnalıster odaǵynyń múshesi Sara Latıevanyń «Sara apaı júrgen sara jol» atty shyǵarmashylyq keshi ótti.
Shara barysynda jazýshy óz shyǵarmashylyq joly týraly áńgimelep, oqyrmandarymen syr bólisti. Qazaq óneriniń qaıtalanbas tulǵalary Hadısha Bókeeva, Kúlásh Baıseıitova týraly jazǵan týyndylarynyń tarıhyna toqtaldy. «Respýblıkalyq «Jalyn» baspasy jańadan ashylǵan kezde Kúlásh týraly jazýdyń sáti túse ketti. Ony biletin, birge júrgen kóp adamdarmen kezdesip, pikirlesýge týra keldi. Árıne, óner tarlandarynyń ómiri tek tabys pen baqyttan turmaıdy, kóleńkeli tustary da bolady. Sonyń bárin eskergen jón. Sonda ǵana tolymdy dúnıe týady. Sóıtip tapsyrys berilip, josparǵa engennen keıin 1984 jyly «Bulbul» kitaby jaryq kórdi», dedi S.Latıeva.
Keshte Qazaqstan Jazýshylar odaǵynyń músheleri, aqyn Aıtqalı Nárikov, prozashy Mıra Shúıinshálıeva, sondaı-aq murajaı isiniń ardageri Sara Tanabaeva jáne basqalar Sara Latıevanyń tek jazýshylyq qana emes, jýrnalıstik eńbeginiń de mol ekendigin atap ótti. Qadyr Myrza Álı atyndaǵy ortalyq dırektory, aqyn Baýyrjan Halıolla oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtyń atynan alǵyshat tabys etti.
Aıta keteıik, Sara Latıeva 1947 jyly Bókeı ordasy aýdany Han ordasy aýylynda dúnıege keldi. Jánibek aýdanynyń ortalyǵy Jánibek aýylynda orta mektepti bitirgennen keıin arman qýyp, Almatyǵa attandy. 1969 jyly QazMÝ-dyń jýrnalıstıka fakýltetin támamdaǵannan keıin osy salada uzaq jyl jemisti qyzmet etti.
«Men soǵysty kórgenim joq», «Bulbul», «Hadısha Bókeeva», «Tóreligin ózderiń aıtyńdar», «Týǵan jerdiń tútini» syndy kitaptardyń avtory.
