Oralda jazýshy Hamza Esenjanovtyń 110 jyldyǵyna oraı sharalar ótti
ORAL. QazAqparat - Oralda kórnekti jazýshy, Memlekettik syılyqtyń ıegeri Hamza Esenjanovtyń (1908-1974) 110 jyldyǵyna oraı sharalar ótti, dep habarlaıdy QazAqparat tilshisi.
Barsha oqyrmanǵa, ásirese, «Aq Jaıyq» trılogııasymen tanymal belgili qalamgerdiń aldymen músini ashyldy.
Qala ákimi Murat Muqaev Aq Jaıyq jurtshylyǵyn óńirdegi osynaý eleýli oqıǵamen quttyqtady.
Eskertkishtiń ashylý rásimine jazýshynyń nemere inisi, akademık, bıologııa ǵylymdarynyń doktory, Ál-Farabı atyndaǵy QazMUÝ-dyń professory Aıtqoja Bıǵalıev, H.Esenjanovtyń kelini, shyǵystanýshy, ilespe aýdarmashy-sınhronıst, Abylaı han atyndaǵy Halyqaralyq qatynastar jáne álem tilderi ýnıversıtetiniń professory, fılologııa ǵylymdarynyń kandıdaty Dına Esenjan, tarıhshy, hamzatanýshy Saılaý Súleımenov jáne basqalar qatysyp, estelikterin aıtty.
Músindi saltanatty túrde aqyn, Qazaqstan Jazýshylar odaǵy BQO bólimshesiniń tóraıymy, halyqaralyq «Alash» ádebı syılyǵynyń ıegeri Aqushtap Baqtygereeva men Aıtqoja Bıǵalıev ashty.
Budan keıin H.Bókeeva atyndaǵy oblystyq qazaq drama teatrynda «Hamza Esenjanov - adamzattyń asyly» atty ádebı-mýzykalyq kesh ótip, qalamger ómiri men shyǵarmashylyǵyna taldaý jasaldy.
Jıyn barysynda «Tuǵyry bıik talant» atty jańa kitaptyń tanystyrylymy bolyp, teatr foıesinde «Qaısar talant arqalaǵan nar senim, umytpaıtyn urpaqtaryń bar seniń» taqyrybynda kitap kórmesi, fotoekspozıtsııa men qundy jádigerler kelýshiler nazaryna usynyldy.
Merekeni uıymdastyrýǵa H.Esenjanov atyndaǵy oblystyq balalar men jasóspirimder kitaphanasy da belsene atsalysty.
Eske sala keteıik, budan buryn Batys Qazaqstanda jazýshyǵa taǵy bir músin ornatylǵanyn jazǵan bolatynbyz.
