Oralda jazýshy Baqtyǵul Oıshybaevty eske alý keshi ótti
ORAL. QazAqparat - Búgin Qadyr Myrza Álı atyndaǵy mádenıet jáne óner ortalyǵynda belgili qalamger, Qazaqstan Jazýshylar odaǵynyń múshesi Baqtyǵul Oıshybaevty (1940-1997) eske alýǵa arnalǵan «Qalamy júırik jazýshy» atty eske alý keshi ótti, dep habarlaıdy «QazAqparat» tilshisi.
Osynaý sharaǵa Almaty, Astana qalalarynan arnaıy kelgen meımandar men Jaıyq jurtshylyǵy aldymen Qadyr kabınetinde jasaqtalǵan Baqtyǵul Oıshybaevqa arnalǵan estelik buryshymen tanysty. 
Kontsert zalynda ótken eske alý keshi jazýshy-jýrnalıstiń ómir belesteri beınelengen teatrlandyrylǵan qoıylymmen ashyldy. Oblys ákiminiń orynbasary Marat Toqjanov óńirdiń baspasóz salasynda uzaq jyl qajyrly eńbek etken qalamgerdiń esimi umytylmaıtyndyǵyn jetkizdi. Sondaı-aq aqyn, Qazaqstan Jazýshylar odaǵy BQO bólimshesiniń tóraıymy, halyqaralyq «Alash» ádebı syılyǵy men «Qurmet» ordeniniń ıegeri Aqushtap Baqtygereeva, jazýshylar, Memlekettik syılyqtyń jáne M.Sholohov atyndaǵy halyqaralyq syılyqtyń laýreaty Sábıt Dosanov pen Altynshash Jaǵanova estelikterimen bólisti. 
«Baqtyǵul nebári 57 jasynda ómirden ozdy. Ol óziniń dańqty jerlesteri, Alashtyń kórnekti qaıratkerleri Jahansha men Halel Dosmuhamedovter jóninde derekter jınastyryp, roman jazýdy oılastyryp júrgen. Ókinishke qaraı, úlgere almaı ketti. Ol óz týyndylarynda, ásirese, aýyl adamdarynyń tynys-tirshiligin, minez-bitimin shynaıy bere bildi. Sondyqtan da Baqtyǵuldy zamandastary erekshe qurmetteıtin», dedi óz sózinde jazýshynyń dosy S.Dosanov.
Baqtyǵul Oıshybaev Syrym aýdanynda jergilikti gazetke basshylyq jasaı júrip, óziniń kórgen-bilgenin kórkem tilmen kestelep, ádildik týyn kótere bildi.
Qalamgerdiń jary Mánıra Zákirqyzy men uly Kemelbek Oıshybaev qurmetti qonaqtar men sharany uıymdastyrýshylarǵa alǵysyn bildirdi.
Shara barysynda oblys ónerpazdary áýelete án shyrqap, kesh shyraıyn asha tústi.
Aıta keteıik, burynǵy Taıpaq (qazir Aqjaıyq) aýdanynda dúnıege kelgen Baqtyǵul Oıshybaev 1966 jyly Qazaq ulttyq ýnıversıtetiniń jýrnalıstıka fakýltetin bitirgennen keıin respýblıkalyq «Lenınshil jas», Taıpaq, Jympıty aýdandyq gazetterinde qyzmet etti.
Ásirese, Jympıty (qazirgi Syrym) aýdandyq gazetine kóp jyl basshylyq etip, jastardy tárbıelep, keıingi býynnyń qalyptasýyna aıryqsha eńbek sińirdi. Aýylda júrip te, kórkem shyǵarmalar jazýyn toqtatpaǵan qalamger 1983 jyly Qazaqstan Jazýshylar odaǵy músheligine qabyldandy. Kózi tirisinde «Alystan kóringen ot», «Qımas kúnder» atty jınaqtary jaryq kórse, 2010 jyly urpaqtarynyń qurastyrýymen «Ómir belesteri» kitaby basylyp shyqty.
