Oralda jazasyn óteýshiler arasynda «Úmit-2017» baıqaýy márege jetti
ORAL. QazAqparat - BQO boıynsha qylmystyq-atqarý júıesi departamentinde RÝ-170/2, RÝ-170/3 mekemelerinde jazasyn óteýshiler arasynda sýretter men qoldanbaly óner buıymdarynyń «Úmit-2017» baıqaýy márege jetti, dep habarlaıdy «QazAqparat» tilshisi.
Departamenttiń bas mamany, ádilet maıory Tımýr Dúısálıevtiń aıtýynsha, jyl saıyn ótetin dástúrli baıqaýǵa 7 sýret pen 6 qoldanbaly óner buıymy usynylǵan. Olardyń ishinde músinder, asúı aspaptary bar. Sýretter negizinen peızaj janrynda salynǵan.
Qazylar alqasynyń uıǵarymymen RÝ-170/2 mekemesinde jazasyn óteýshi R.Shýkalovtyń «Tabıǵat týraly» sýreti men RÝ-170/3 mekemesinen A.Neznanovtyń «Qulager» buıymy úzdik dep tanyldy. R.Baıjazyqov «Kishkentaı aspaz» sýretimen, E.Elemesov (RÝ-170/3) «Táj-Mahal kesenesi» buıymymen ekinshi, I.Muhamedǵalıev «Sarqyrama» sýretimen, T.Dáýletov (RÝ-170/3) «Qazaq batyry» buıymymen úshinshi orynǵa ıe boldy.
Saıys jeńimpaz-júldegerleri dıplomdarmen jáne syılyqtarmen marapattaldy. Al jumystar balalar men bóbekter úılerine tegin berilmek.
