Oralda jazasyn óteýshiler 36 myńǵa jýyq medıtsınalyq maska tikti
ORAL. QazAqparat – Oralda jazasyn óteýshiler 36 myńǵa jýyq medıtsınalyq maska tikti, dep habarlaıdy QazAqparat tilshisi.
BQO boıynsha qylmystyq-atqarý júıesi departamentiniń aǵa ınspektory, ádilet aǵa leıtenanty Dastan Aqsholaqovtyń aıtýynsha, koronavırýstyń taralýyna tosqaýyl qoıýǵa úles qosý maqsatynda maska tigý qolǵa alyndy.
«Qazirgideı kezeńde asa mańyzdy bul isti uıymdastyrý úshin RÝ-170/3 mekemesinde óndiristik tseh bólindi. Jumys eki aýysymda atqarylýda. 29 jazasyn óteýshi kúnine 2 myńdaı maska tigýde. Kúni búginge deıin 36 myńǵa jýyq medıtsınalyq maska shyǵaryldy. Betperdemen aldymen departamentke qarasty qylmystyq-atqarý júıesi mekemelerinde jazasyn ótep jatqandar, sodan keıin oblystyq polıtsııa departamenti qamtyldy», dedi QazAqparat tilshisine D.Aqsholaqov.
Jazasyn óteýshiler maskany tigýge qulshyna kiriskenderin jetkizdi.
«Mundaı qıly kezeńde árkim de óz úlesin qosýy tıis. Budan biz de shet qala almadyq. Eger adamdarǵa kómegimizdi tıgizsek, soǵan rızamyz. Budan bylaı da óz isimizge jaýapkershilikpen qarap, ónim kólemin kóbeıte túspekshimiz», dedi RÝ-170/3 mekemesinde V. esimdi jazasyn óteýshi.
Eske sala keteıik, budan buryn dalada jumys isteıtin eńbek adamdaryna kóbirek kóńil bólý kerektigin jazǵan bolatynbyz.
