Oralda jazasyn óteýshige uıaly telefon bermekshi bolǵan turǵyn jaýapqa tartyldy
ORAL. QazAqparat - Oral qalasynda RÝ-172/2 túzetý mekemesinde jazasyn óteýshige uıaly telefon bermekshi bolǵan turǵyn jaýapqa tartyldy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, mekeme qyzmetkerleri uıaly telefondy pakettegi azyq-túliktiń astyna jasyrylǵan jerinen tapqan.
Tyıym salynǵan zat tárkilenip, ony jazasyn óteýshige jetkizbek bolǵan er adamǵa qatysty QR Ákimshilik quqyqbuzýshylyq kodeksi 481-baby 1-bóligine sáıkes hattama toltyryldy.
Oral qalasy mamandandyrylǵan ákimshilik sotynyń qaýlysymen quqyq buzýshy 22690 teńge kóleminde aıyppul tóleıtin boldy.
Aıta keteıik, túzetý mekemelerine tyıym salynǵan zattardy alyp ótpek bolǵany úshin jyl basynan beri 5 adam ákimshilik jaýapkershilikke tartyldy.
