Oralda jazasyn óteýshi túrme qyzmetkerine qarjy aýdaryp jibergen
BQO boıynsha qylmystyq-atqarý júıesi departamentiniń baspasóz qyzmetinen túsken málimetke qaraǵanda, oqıǵa osy aıda RÝ-170/3 mekemesinde oryn aldy.
Atalǵan departament pen BQO sybaılas jemqorlyqqa qarsy qyzmet qyzmetkerleri jedel aldyn alý sharalary barysynda mekeme qyzmetkeriniń banktik esepshotyna 30 myń teńge aýdarylǵanyn anyqtady.
Aqshany RÝ-170/3 mekemesinde jazasyn óteýshi jibergen bolyp shyqty.
«Atalǵan qarjy tárkilengen tyıym salynǵan zatty qaıtaryp alý jáne sony jasyrý maqsatynda laýazymdy tulǵaǵa zańsyz syıaqy berý retinde joldanǵan. Alaıda mekeme qyzmetkeri bul derek týraly mekeme basshylyǵy men departamenttiń ózindik qaýipsizdik ókiline jáne sybaılas jemqorlyqqa qarsy qyzmetke jazbasha túrde baıan etken», dedi BQO boıynsha qylmystyq-atqarý júıesi departamentiniń bastyǵy Azamat Іzteleýov.
Qazirgi kezde QR QK 367-baby 1-bóligine (para berý) sáıkes sotqa deıingi tergeý amaldary júrgizilýde.
Eske sala keteıik, Oralda iz-túzsiz ketken 54 jastaǵy er adamnyń tabylmaı jatqanyn jazǵan bolatynbyz.