Oralda «Jaıyqjylýqýat» AQ-nyń burynǵy basshysy 7 jylǵa sottaldy
ORAL. QazAqparat - Oral qalalyq sotynyń 30 qańtardaǵy úkimimen «Jaıyqjylýqýat» AQ-nyń burynǵy bas dırektory Nurlybek Kıreev 1997 jylǵy redaktsııadaǵy QR QK 176-baby 4-bóligi «b» tarmaǵyna sáıkes (qyzmet babyn paıdalanyp, top bolyp aldyn ala kelisý arqyly asa iri kólemde bótenniń múlkin ıemdený) aıypty dep tanylyp, múlkin tárkileýmen birge 7 jylǵa bas bostandyǵynan aıyrý jazasyn jalpy tártiptegi túzetý kolonııasynda óteýge sottaldy, dep habarlaıdy «QazAqparat» HAA tilshisi.
Oral qalalyq sotynan túsken málimetke qaraǵanda, ol sondaı-aq 5 jylǵa memlekettik mekemelerde laýazymdy qyzmet atqarý quqyǵynan aıyryldy. Oǵan qosa N.Kıreev buryn sottalǵan osy kásiporynnyń memlekettik satyp alý bóliminiń burynǵy bastyǵy Bakar Kárimovpen birge «Jaıyqjylýqýat» AQ-ǵa keltirilgen 349 mln. astam teńge zalaldy óteýi tıis.
Sot úkimi zańdy kúshine engen joq.
Eske sala keteıik, B.Kárimov Oral qalalyq sotynyń 2016 jylǵy 7 qyrkúıektegi úkimimen dál sondaı bappen aıypty dep tanylyp, 7 jylǵa sottalǵan bolatyn. Ol qazir jazasyn óteýde. Sot talqysynda belgili bolǵanyndaı, ekeýi aldyn ala sóz baılasyp, Oral jylý-qýat ortalyǵyndaǵy japondyq «Hitachi» gaztýrbınalyq qondyrǵysyna qosalqy bólshekter ákelý jóninde zańsyz memlekettik satyp alý konkýrsyn uıymdastyrǵan. Sonyń nátıjesinde Reseıdiń Kalýga qalasyndaǵy «Týrbopromservıs» kompanııasy jeńimpaz atanǵan. Sodan keıin kelisimshartqa sáıkes «Jaıyqjylýqýat» AQ-dan atalǵan kompanııaǵa qarjynyń teń jartysy, ıaǵnı 349 mln. teńge aýdarylǵan. Bul qarjyny uıymdasqan qylmystyq top jymqyryp, «Jaıyqjylýqýat» AQ-ǵa osynshama kólemde zalal keltirgen.
