Oralda «Jaıyqtyń jadyndaǵy jaqsy adam» atty eske alý keshi ótkizildi
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda Qazaqstan Jazýshylar odaǵynyń múshesi, belgili qalamger, matematık-ustaz Qaıyr Quraqulannyń (Bekturǵanov) 80 jyldyǵyna oraı «Jaıyqtyń jadyndaǵy jaqsy adam» atty eske alý keshi ótkizildi, dep habarlaıdy «QazAqparat» HAA tilshisi.
Qazirgi Aqjaıyq aýdany Taıpaq aýylynda dúnıege kelip, Oraldaǵy S.Seıfýllın atyndaǵy №11 mektep-ınternatyn altyn medalmen bitirgen Qaıyr Quraquly 1960 jyly QazPI-diń fızıka-matematıka fakýltetin úzdik támamdaǵannan keıin ómir boıy ustazdyq etti. Onyń esimin Batys Qazaqstan aýyl sharýashylyǵy ınstıtýtynan túlep ushqandar jaqsy biledi.
Matematıka syndy kúrdeli ǵylymdy ıgerip, ony jas urpaqqa jetkizýmen birge jazýshylyǵyn tastamaǵan Qaıyr Quraqulan kóptegen ádebı kitaptar shyǵardy. 1976 jyldyń qorytyndysymen «At jaly» povesi úshin respýblıkalyq «Jalyn» jýrnalynyń jabyq báıgesinde júlde alǵan qalamger 1982 jyly Qazaqstan Jazýshylar odaǵynyń músheligine ótti. Ómir boıyna adamı qadir-qasıetti joǵary ustap, kisiliginen aınymaǵan ol kishige qamqor, úlkenge syıly bola bildi. Ádebı týyndylar óz aldyna, qazaqtyń janyna tıetin ózekti taqyryptyń biri - til men dindi de qozǵap, kólemdi maqalalar jazdy. Eske alý keshinde qalamgerdiń zaıyby, ózi de ardager-ustaz Nadejda Jubaıqyzy, jýrnalıstıka ardageri Tıhon Álipqalıev, shákirtteriniń biri, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń professory, aýyl sharýashylyǵy ǵylymdarynyń kandıdaty Bolatqalı Tólebaev jazýshy-azamattyń, mine, osyndaı qasıetteri jóninde syr shertti.
Ádebı-mýzykalyq keshte sondaı-aq qalamger qurmetine oraldyq ártister oryndaǵan ánder erekshe áser qaldyrdy. Kitap kórmesi de uıymdastyryldy. 
