Oralda «Jaıyqtyń qos qyrany» atty respýblıkalyq aqyndar aıtysy ótedi
ORAL. QazAqparat – Batys Qazaqstan oblysynda Qazaqstannyń halyq jazýshylary, aqyndar, Memlekettik syılyqtyń laýreattary Juban Moldaǵalıev pen Qadyr Myrza Álıge arnalǵan mereıtoılyq sharalar bolmaqshy, dep habarlaıdy QazAqparat tilshisi.
BQO mádenıet basqarmasy málim etkenindeı, Jubannyń 100 jyldyǵy men Qadyrdyń 85 jyldyǵy óńirde 25-27 qyrkúıek kúnderi atalyp ótiledi.
Alǵashqy kúni Aqjaıyq aýdany ortalyǵy Chapaev aýylynda Juban ortalyǵy ashylady.
Oral qalasynda ótetin «Jaıyqtyń qos qyrany» respýblıkalyq onlaın aıtysy eki kúnge sozylmaqshy.
Oralda Juban eskertkishi, sondaı-aq Abaı dańǵyly ashylady.
Qadyr Myrza Álı eskertkishine gúl shoqtary qoıylyp, aqyn atyndaǵy oblystyq mádenıet jáne óner ortalyǵynda «Qazaqtyń qadyry» oblystyq jyr músháırasynyń jeńimpaz-júldegerleri marapattalady.
J.Moldaǵalıev atyndaǵy oblystyq ǵylymı ámbebap kitaphanasynda «Juban jyrlary – ǵasyr úni» atty halyqaralyq ǵylymı-praktıkalyq konferentsııa ótedi.
H.Bókeeva atyndaǵy oblystyq qazaq drama teatrynda «Juban» entsıklopedııasynyń tusaýy kesilip, «Qııal qanaty», «Juban oqýlary» baıqaýlarynyń jeńimpazdaryna qurmet kórsetiledi.
Teatrda «Juban» spektakliniń premerasy qoıylady.
Eske sala keteıik, budan buryn Oralda Juban aqynnyń 100 jyldyǵyna arnalǵan baıqaýdyń márege jetkenin jazǵan bolatynbyz.
