Oralda «Jaıyqmunaı» JShS-nyń 15 jyldyǵy atalyp ótildi

Aldymen kompanııanyń tynys-tirshiligi jóninde derekti fılm kórsetildi.

«Jaıyqmunaı» JShS-nyń bas dırektory Vıacheslav Drýjınınniń atap ótkenindeı, kompanııa sońǵy bes jyldyń ishinde úlken tabystarǵa qol jetkizdi. Birneshe iri jobalar júzege asyryldy. Sonyń eleýlisi - gazdy keshendi daıyndaý qondyrǵysy. Munyń jalpy quny 49 mlrd. 328 mln. teńgeni qurady. «Jaıyqmunaı» JShS tek salyq túrinde 175,8 mln. dollar aýdardy.

Kompanııa qazaqstandyq mamandardy oqytýǵa erekshe nazar aýdaryp keledi. Osy maqsatqa 7 mln. dollar jumsaldy. Qazirgi kezde kompanııada qyzmet isteıtinderdiń 97 paıyzy qazaqstandyqtar bolyp tabylady.

«Jaıyqmunaı» JShS ujymyn mereıtoıymen oblys ákiminiń birinshi orynbasary Ǵumar Dúısembaev quttyqtap, izgi tilegin bildirdi. Ol Chınarev kenishin damytýǵa 1,8 mlrd. astam AQSh dollary jumsalǵanyn atap ótti. Kompanııa men BQO ákimdigi arasyndaǵy memorandýmǵa sáıkes gaztýrbınaly elektr stansasy úshin gaz jeńildetilgen baǵamen berilip keledi. Bul elektr qýatynyń baǵasyn ósirmeýge septigin tıgizýde. Kompanııa kadrlardy ulttandyrý, ımport almastyrý máselelerin únemi nazarda ustaýda. Aıtalyq, 150-den astam jergilikti maman oqyp, bedeldi mamandyqtardy meńgerdi. Áleýmettik maqsatqa 4 mln. astam dollar bólinip, óńir men kompanııa ornalasqan Zelenov aýdanynda kóptegen jumystar atqaryldy. Endigi maqsat - gazdy keshendi daıyndaýdyń úshinshi kezeńin aıaqtap, ónim óndirýdi eki esege ulǵaıtý.

Kompanııanyń ozat qyzmetkerlerine oblys ákiminiń alǵyshattary tabys etildi.