Oralda «Jaıyq júırigi» báıgesinde qaraǵandylyq shabandoz páter utyp aldy
ORAL. KAZINFORM — Oralda qala kúni aıasynda «Jaıyq júırigi — 2025» ataýymen báıge túrlerinen Batys Qazaqstan oblysy ashyq chempıonatynyń jeńimpazdary anyqtaldy.
Dúbirli dodaǵa tek elimizden ǵana emes, kórshiles Reseı Federatsııasynyń Tatarstan, Bashqurtstan, Orynbor jáne Chelıabi óńirlerinen kelgen 100-ge jýyq shabandoz qatysty.
Aldymen 1 400 metrlik eki jastaǵy ushqyr júırikter arasynan oraldyq Dıdarbek Kúrishbek «Dat sekıýrıtı» tulparymen aldyna jan salmady. Reseılik Snejana Taımasova «Zlatodarymen» márege ekinshi bolyp keldi. Úshinshi júlde oraldyq Ramazan Tabyldıevtiń («Darı ard») enshisinde ketti.
Dıdarbek Kúrishbek 2 myń metrlik ushqyr báıgeden «Nur-Shatoıa» tulparymen aldyna jan salmady. R.Tabyldıev «Geradotpen» ekinshi, Danııar Bazarbaev «Shpıkermen» úshinshi orynǵa ıe boldy.
Al 11 shaqyrymdyq qunan báıgede Almaty oblysynyń atynan shyqqan Marden Janbolat «Shamshyraǵymen» úzdik atandy. Tarazdyq Dáýletbaı Meıirge («Qaragóz») — ekinshi, oraldyqtar Arnat Murathanǵa («Samǵaý») — úshinshi, Meras Muratqa «Hanym») — tórtinshi, pavlodarlyq Amanjol Sultanǵa («Shah») besinshi oryn buıyrdy.
Top báıgede (16 shaqyrym) 32 tulpardyń arasynan Almaty oblysynyń ókili Ertós Islamnur «Tobylǵy torysymen» bas júldeni jeńip aldy. Almatylyq Arnat Murathan («Kerbez») — ekinshi, shyǵysqazaqstandyq shabandoz Serjan Baqtybaı («Tasymhan») — úshinshi, oraldyq Madııar Qurmanǵalı («Aqjaıyq») — tórtinshi, qyzylordalyq Aqyljan Saparǵalı («Aqkóz») besinshi júldege ıe boldy.
Jarys kórigin 31 shaqyrymdyq alaman báıge qyzdyrdy. Munda «Aıtory» tulparymen Qaraǵandy oblysynyń namysyn qorǵaǵan Marden Janbolattyń baǵy janyp, bas júlde — páter kiltin aldy. Ertós Islamnur (Jambyl oblysy) ekinshi (3 mln teńge), BQO Tasqala aýdanynyń ókili Jiger Bekbolatuly úshinshi (2 mln teńge), taǵy bir tasqalalyq Berhan Edres tórtinshi (1 mln teńge), Aqjaıyq aýdanynan kelgen Nurqanat Erqanat besinshi (500 myń teńge) orynnan kórindi.
«Jaıyq júıriginiń» jalpy júlde qory 45 mln teńgege baǵalandy.
Eske sala keteıik, budan buryn Oralda báıgeden el chempıonatynyń sońǵy irikteý kezeńi máresine jetkenin jazǵan edik.