Oralda Jaıyq jaǵalaýyndaǵy aǵashtar nelikten kesilip jatyr
ORAL. KAZINFORM — Oral qalasynda Jeńis alańy (Stella) tusynda Jaıyq jaǵalaýyndaǵy aǵashtardyń otalǵany jóninde áleýmettik jelide beınejazba taraldy.
Turǵyndar osyǵan baılanysty túrli pikirlerin bildirip jatyr. Bireýler sońǵy kezde qalada terekterdiń kóp kesilip jatqanyn aıtsa, endi birqatary jasyl jelektiń ornyn toltyrý, sonymen qatar Jaıyq jaǵalaýyn qoqystan túgel tazartý kerektigin jetkizdi.
Kazinform tilshisi osy máseleniń anyq-qanyǵyna kóz jetkizip kórgen edi.
Oral qalasy ákimdiginen túsken málimetke qaraǵanda, atalǵan aýmaqta «Jaıyq ózeni jaǵalaýyndaǵy ekopark aýmaǵyn abattandyrý jáne jaǵalaýdy bekitý» jobasyn iske asyrý aıasynda daıyndyq jumystary júrgizilip jatyr.
Qazirgi ýaqytta aýmaqty tazartý, topyraqty daıyndaý jáne tegisteý, sondaı-aq qurylys jumystary júrgiziletin aımaqqa túsetin jasyl jelekti alyp tastaý jumystary atqarylyp keledi.
Joba aıasynda jaǵalaýdy bekitý, jaıaý júrginshiler joldaryn salý, syrtqy jaryqtandyrý jáne beınebaqylaý júıelerin ornatý, shaǵyn sáýlet nysandaryn ornalastyrý, sondaı-aq aýmaqty kógaldandyrý jáne abattandyrý kózdelgen.
— Daıyndyq jumystarynyń júrgizilýi jaǵalaý syzyǵyn nyǵaıtý, aýmaqtyń deńgeıin jobada belgilengen mejege deıin kóterý, sondaı-aq sý tasqyny kezeńinde jerdiń shaıylýy men sý basýynyń aldyn alýǵa baǵyttalǵan jobalyq sheshimderge baılanysty. Negizgi qurylys-montaj jumystary aıaqtalǵannan keıin aýmaqty kógaldandyrý boıynsha keshendi jumystar júrgizý josparlanǵan, — delingen resmı jaýapta.
«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıev qala ákimdiginiń bastamasyn qoldaıtynyn bildirdi. Degenmen, atalǵan aýmaq rekreatsııalyq aýmaqqa jatady. Zańnamaǵa sáıkes ákimdik iske kirispes buryn áýeli qoǵamdyq tyńdaý ótkizip, turǵyndarǵa túsindirý kerek edi. Alaıda bul jasalmaǵan.
Ekologtiń pikirinshe, Jaıyq jaǵalaýyn abattandyryp, Stelladan bastap, ony Han toǵaıyna deıin qosyp, adamdar serýendeıtin orynǵa aınaldyrý qajet. Keńes dáýirinde eski soborǵa deıin bóget boldy. Onyń joǵarǵy jáne tómengi bóliginde terekter ózdiginen ósip ketken. Mine, sodan tazartqan durys.
— Taǵy bir másele, Stella mańynda Jaıyqtyń burynǵy arnasynda shaǵyn toǵaı bar. Meniń oıymsha, osy jerde tolyq tazartý jumystaryn júrgizip, ekologııalyq park jasaýǵa bolady. Árıne, bul rette ekologter men mamandardyń pikirin eskerse, artyqtyq etpeıdi, — dedi D. Sarıev.
Eske sala keteıik, budan buryn Oralda emhana aldyndaǵy skver saqtala ma, osyǵan oraı BQO densaýlyq saqtaý basqarmasy jaýap bergenin jazǵan edik.
Sondaı-aq Batys Qazaqstanda orman aǵashtarynyń otalyp jatqany ras pa, bul jóninde de habarlandy.
