Oralda Jaıyq ózenindegi kópir eki aptaǵa jabylady

ORAL. KAZINFORM — Halyqaralyq mańyzy bar Aqtóbe-Oral-RF shekarasy avtomobıl jolynyń 254-262 shaqyrymy aralyǵynda Jaıyq ózenindegi kópirde deformatsııalyq jikterdi aýystyrý jumystary júrgiziledi. 

Atalǵan kópir Oral qalasynan Terekti aýdany Podstepnyı aýylyna qaraı shyǵatyn jolda ornalasqan. 

«QazAvtoJol» UK» AQ BQO fılıalynan málim etkenindeı, josparly jóndeý jumystaryna baılanysty atalǵan ýchaskede 17 shilde kúni saǵat 20:00-den bastap 1 tamyz saǵat 8:00-ge deıin kólik qozǵalysyna shekteý engiziledi. 

— Balama jol — Melovye gorkı kenti arqyly ótetin aınalma jol. Osyǵan baılanysty barlyq jol paıdalanýshylarynan saparlaryn aldyn ala josparlap, ýaqytsha shekteýlerdi eskerýdi suraımyz, — delingen resmı málimette.

Oral qalasy ákimdiginen alynǵan málimetke qaraǵanda, sonymen qatar shaharda S. Datov jáne Jambyl kósheleriniń qıylysynda, «Promenad» saýda úıi mańynda temirjol kúrdeli jóndeýden ótkiziledi. Soǵan baılanysty 18 shilde kúni saǵat 20.00-den bastap 21 shilde saǵat 06.00-ge deıin barlyq kólik túrleri úshin temirjol ótkeli arqyly júrý ýaqytsha toqtatylady. Qoǵamdyq kólik Jambyl, Rýjeınıkov jáne Gagarın kósheleri arqyly aınalma jolmen qatynaıdy.

Eske sala keteıik, budan buryn Oralda Depo kópiri jóndeýden keıin qaıta ashylǵanyn jazǵan edik.