Oralda Jaıyq ózeni jaǵasyndaǵy úıler turǵyndary kóshiriledi
ORAL. KAZINFORM — Oral qalasynda Chapaev zatony kóshesinde Jaıyq ózeni jaǵalaýyndaǵy úılerge qaýip tónip tur.
Oral qalasy ákiminiń orynbasary Jandos Dúısenǵalıevtiń málim etkenindeı, jyl saıyn kóktemgi tasqyn kezde sý shaıǵan jar qulap, birte-birte turǵyn úılerge jaqyndap keledi.
Jandos Ashatulynyń sózine qaraǵanda, aldaǵy jyldary sý tasqyny saldarynan úılerdiń shaıylyp ketý qaýpi joǵary.
— Osyǵan baılanysty arnaıy komıssııa qurylyp, atalǵan aýdanda rekvızıtsııalaý jumystary bastaldy. Bul — tabıǵı apattyń aldyn alý maqsatynda zańdy negizde júrgiziletin shara. Sonymen qatar turǵyndardyń qaýipsizdigi men ómirin saqtaý jolyndaǵy mańyzdy qadam. Barlyq is-shara Qazaqstan Respýblıkasynyń zańnamasyna sáıkes júzege asyrylady. Qazirgi tańda turǵyndarmen túsindirý jumystary júrgizildi, aldaǵy ýaqytta úıler men aýmaqtardy baǵalaý bastalady. Baǵalaý qorytyndysy boıynsha múlik ıelerine ótemaqy tólenedi ári jer memleket qajetine alynatyn bolady, — dedi J.Dúısenǵalıev.
Onyń aıtýynsha, bul jumystardy jazdyń sońyna deıin aıaqtaý kózdelip otyr.
Chapaev zatony kóshesi 111-úıde turatyn Vıktor Svııagın baspanasy men jeri, dúnıe-múlki ádil baǵalansa eken degen tilegin jetkizdi.
— Osy úıde turyp jatqanymyzǵa 16 jyl boldy. Úıimiz úsh bólmeli, jyly verandasy, aýlada garaj, taýyq qora bar. Baý-baqsha otyrǵyzamyz, jemis aǵashtary ósip tur. Komıssııanyń qashan keletinin ázirge bilmeımiz. Barlyǵy 10 úıdeı kóshiriledi dep aıtylǵan. Buıyrǵanyn kóremiz. Ózim bıyl 66 jasqa tolamyn. Qalǵan ýaqytta ýaıymsyz ómir súrgenge ne jetsin, — dedi Kazinform tilshisine V.Svııagın.
Eske sala keteıik, budan buryn Jaıyq ózenindegi sý deńgeıi tómendeı bastaǵanyn jazǵan bolatynbyz.