Oralda jataqhanadaǵy órtten keıin gazdan ýlanǵan úsh adam aýrýhanada jatyr
ORAL. QazAqparat – Oralda jataqhanadaǵy órtten keıin gazdan ýlanǵan úsh adam aýrýhanada jatyr, dep habarlaıdy QazAqparat tilshisi.
Budan buryn jazǵanymyzdaı, Oralda jataqhanadaǵy órtten 45 adam evakýatsııalanyp, 5 adam aýrýhanaǵa jetkizilgen bolatyn.
Oblystyq densaýlyq saqtaý basqarmasynyń baspasóz qyzmeti málim etkenindeı, órt saldarynan gazdan ýlanǵan 26 jastaǵy er adam, 44 jastaǵy áıel adam qalalyq kópbeıindi aýrýhanaǵa jatqyzyldy. Sondaı-aq 27 jastaǵy áıel 5 jasar uly jáne 3 jasar qyzymen oblystyq kópbeıindi balalar aýrýhanasyna tústi. Báriniń de jaǵdaıy ortasha aýyr.
«Qazirgi tańda eresek adamdar aýrýhanada jatyr. Balalar aýrýhanada qaralǵannan keıin ambýlatorlyq em alýǵa jiberildi», dep habarlady basqarmanyń baspasóz qyzmeti.
Budan basqa 28 jastaǵy er adam, 28 jastaǵy áıel, 6 jáne 2 jasar qyz balalar jeńil dárejede gazdan ýlanǵan. Olar oqıǵa ornynda qaralǵannan keıin úılerine jiberilgen.
BQO TJ departamenti memlekettik órt baqylaý basqarmasynyń aǵa ınjeneri Saǵdat Ánestiń sózine qaraǵanda, órttiń sebebi naqtylaný ústinde. Ázirge ot elektr symdarynyń qysqa tuıyqtalýynan shyqqan degen boljam bar.
Eske sala keteıik, budan buryn Oralda tok soqqan er adamnyń qaza bolǵanyn jazǵan edik.
