Oralda «Jasyl jelek» is-sharasyna myńǵa jýyq jas qatysyp, 500-deı kóshet otyrǵyzdy
Ekologııalyq aktsııaǵa Batys Qazaqstan oblysynyń ákimi Narıman Tóreǵalıev, óńirdegi jastar uıymdarynyń ókilderi, JOO jáne kolledjder stýdentteri, «Jasyl el» eńbek jasaqtarynyń sarbazdary, sportshylar, eriktiler men belsendi jastar, barlyǵy 1 myńǵa jýyq adam qatysty.
Sońǵy jyldary jańadan boı kóterip jatqan shaǵynaýdan aýmaǵynda tazalyq jumystary júrgizilip, 500-ge jýyq aǵash otyrǵyzyldy.
«Biz osyndaı ekologııalyq aktsııalarǵa jyl saıyn qatysyp kelemiz. Osylaısha, qalamyzdyń taza bolyp, jasyl jelekpen kómkerilýine úles qosamyz. Bul – kóppen bitetin jumys. Sondyqtan shahar turǵyndaryn senbilikterge belsene qatysýǵa shaqyramyz», - dedi «Aqjaıyq jastary» jastar volonterlik korpýsynyń kóshbasshysy, M.Ótemisov atyndaǵy Batys Qazaqstan ýnıversıteti fılologııa fakýltetiniń 2-kýrs stýdenti Zarına Bozova.
BQO qoǵamdyq damý basqarmasy jastar isi bóliminiń basshysy Ranıda Áshenovanyń sózine qaraǵanda, búgingi tal egýmen «Jasyl el» eńbek jasaqtarynyń jumysy resmı túrde bastaldy.
Bıyl eńbek jasaqtarymen 1175 jasty qamtý josparlansa, sonyń 1 myńy Oral qalasynda, 475-i aýdandarda eńbek etpek. Atalmysh joba oblysta 2007 jyldan beri júzege asyrylyp keledi.
BQO qoǵamdyq damý basqarmasy tarapynan bıyl memlekettik áleýmettik tapsyrys aıasynda «Jasyl el» jobasyna qatysatyn jastarǵa qosymsha aqy tóleý úshin 58,2 mln teńge qarastyryldy.
«Oral qalasy men 12 aýdanda sáýir-qarasha aılarynda maýsymdyq jumystarǵa qatysatyn sarbazdar arnaıy ekıpırovkamen, qural-jabdyqtarmen tolyq qamtylady. Olar abattandyrý, tal egý, tazalyq jumystarymen aınalysady. Stýdenttermen qatar jumyssyz jastar da tartylmaqshy. Ótken jyly Batys Qazaqstan oblysynyń «Jasyl el» shtaby respýblıka boıynsha úzdik atanǵan bolatyn. Bıyl da sol baǵytta jumystanbaqshy», dedi QazAqparat tilshisine Ranıda Áshenova.
