Oralda jastarǵa arnalǵan kovorkıng ortalyǵy ashyldy
ORAL. QazAqparat - Oralda oqýshylar jáne jastar saraıynda jastarǵa arnalǵan «Bastau» kovorkıng ortalyǵy ashyldy, dep habarlaıdy «QazAqparat» tilshisi.
Bul qala men oblys jastary, ásirese, jastar uıymdarynyń belsendileri úshin eleýli oqıǵa boldy. Buryn olardyń kóbiniń óz ıdeıalaryn talqylap, júzege asyrý úshin bas qosatyn turaqty orny joq edi. Endi shartty túrde tórt aımaqqa (dáris aımaǵy, jeke jumys, komandalyq jumys alańy jáne erkin aımaq) bólingen ortalyqqa kelýshiler ózi qalaǵan formatta jumys isteı alady. Kovorkıng ortalyǵynda jastar ǵalamtor jelisin, materıaldyq-tehnıkalyq bazany tegin paıdalana alady. Munda jastarmen jumys jónindegi oblystyq resýrstyq ortalyqtyń mamandary kelýshilerge tolyq aqparat berip, baǵyt silteıdi.
Oblystyq jastar saıasaty máseleleri jónindegi basqarma basshysy Aıan Sakoshevtiń aıtýynsha, kovorkıng (co-working - aǵylshynshadan aýdarǵanda, birlese qyzmet jasaýshylar) ortalyq barlyq qajetti qural-jabdyqtarmen jasaqtalǵan ujymdyq ofıs qana emes, sonymen qatar túrli mamandyqty meńgergen adamdardyń bir jerde jumys jasaýy bolyp tabylady. Oǵan qatysýshylar táýelsiz ári erkin bolyp qala otyryp, óz qyzmeti úshin ortaq keńistikti paıdalanady. Atap aıtqanda, kovorkıng frılanser, baǵdarlamashylar, dızaınerler jáne kásibin jańa bastaǵan kásipkerler arasynda keńinen taraǵan.
Oraldaǵy kovorkıngte bıznes-trenıngter, sheberlik dáristeri, zııatkerlik oıyndar, pikirtalastar ótkizý kózdelýde. Munda aǵylshyn tilin úırenýshiler klýby ashylady, sondaı-aq beınerolıkti montajdaýshylar, dızaınerler, fotosýretshiler jáne basqalar oqytylady.
Ortalyqty ashý men materıaldyq-tehnıkalyq bazasyn jasaqtaý úshin 3,5 mıllıondaı teńge bólingen.
Oǵan qosa ortalyqta «Rýhanı jańǵyrý» kabıneti ashyldy, onda belsendi jastar «Elime saıahat» jobasyn, «Týǵan ólkem» fotokórmesin, «Elim meniń» veb-saıtyn qolǵa alýdy talqylaı bastady.
Búgin oblys ákimi Altaı Kólginov bastaǵan meımandar barlyq kabınetterde bolyp, olardyń jumystarymen tanysty.
«Elbasymyz Nursultan Ábishuly Nazarbaev jastar - eldiń bolashaǵy ári tiregi, sondyqtan olardyń barlyq máselelerin sheshý memlekettiń basym mindetteriniń biri ekendigin aıtyp, únemi qoldaý kórsetip keledi. Osyndaı memlekettik qoldaýdyń arqasynda jastar óz ıdeıalaryn júzege asyrýǵa múmkindik alyp otyr. «Rýhanı jańǵyrý» baǵdarlamasy aıasynda qurylǵan atalmysh kovorkıng jastardyń el ıgiligi úshin tyń jobalaryn qolǵa alatyn naǵyz ortalyǵyna aınalady dep senemiz», dedi óńir basshysy.
